Vonnisoplegging in Malema-vuurwapensaak begin môre
Die vonnisoplegging van Julius Malema, leier van die EFF, begin môre (15 April) in die Landdroshof in Oos-Londen en sal na verwagting teen Donderdag (16 April) afgehandel wees. Dit volg ná Malema in September verlede jaar ingevolge die Wet op die Beheer van Vuurwapens skuldig bevind is op vyf aanklagte, insluitend die afvuur van ’n vuurwapen in ’n beboude of openbare gebied sonder genoegsame rede, die onwettige besit van ’n vuurwapen en die onwettige besit van ammunisie.
AfriForum het in Augustus 2018 strafregtelike klagte teen Malema aanhangig gemaak nadat hy verskeie skote met ’n vuurwapen afgevuur het tydens die EFF se vyfde verjaardagvieringe op 28 Julie 2018 by die Sisa Dukashe-stadion buite Oos-Londen.
Volgens Jacques Broodryk, AfriForum se hoofwoordvoerder vir Gemeenskapsveiligheid, vra die staat onder meer vir minstens 15 jaar tronkstraf vir die onwettige besit van ’n vuurwapen. “Die landdros het reeds bewys dat niemand verhewe is bo die wet nie. Die vonnis moet nou ook, ongeag Malema se politieke status, die erns van die misdaad weerspieël,” benadruk Broodryk.
AfriForum het ’n beslissende rol gespeel om te verseker dat hierdie saak voor die hof gebring is. Sonder die organisasie se ingryping en volgehoue druk, sou die saak moontlik nooit in die eerste plek tot verhoor gekom het nie. Die saak verteenwoordig ’n beduidende oorwinning in AfriForum se voortgesette pogings om die oppergesag van die reg te handhaaf en gelyke aanspreeklikheid vir almal te verseker.
Die media word genooi om die hofverrigtinge by te woon.
Datum: Woensdag 15 April 2026
Tyd: 09:30
Plek: Oos-Londen Landdroshof, Buffalostraat 4, Oos-Londen
