Privaatvervolgingseenheid help met skuldigbevinding, afsluiting ná bejaarde aangerand is
Ná byna drie jaar het ’n bejaarde vrou, wat aangerand is, uiteindelik berusting gevind met behulp van AfriForum se privaatvervolgingseenheid wat haar en haar man deur ’n uitgerekte en traumatiese regsproses verteenwoordig en ondersteun het. Die Booysens Landdroshof in Johannesburg het Dylan Ferreira (31), die man wat skuldig bevind is aan die aanranding van die destyds 79-jarige Lucille Oosthuysen, gister beveel om R10 000 in vergoeding aan sy slagoffer te betaal en hom ’n boete van R10 000 of 12 maande gevangenisstraf opgelê, wat in geheel vir vyf jaar opgeskort is. Ferreira is in Mei 2024 skuldig bevind aan aanranding met die doel om ernstig te beseer.
Die eenheid het Oosthuysen en haar man, Will, deurlopend ondersteun en die Nasionale Vervolgingsgesag (NVG) van die oudiovisuele toerusting voorsien wat nodig was om deurslaggewende beeldmateriaal in die hof voor te lê. Die video, wat Ferreira se aanval op Oosthuysen vasgevang het, het ’n kernrol in die staat se saak gespeel en was deurslaggewend om sy skuldigbevinding te verseker. Die eenheid het elke hofverskyning bygewoon om te verseker dat geregtigheid geskied.
Landdros Nicola Olivier het die aanranding, wat op 5 Augustus 2023 in Mayfield, suid van Johannesburg plaasgevind het, as wreedaardig beskryf. Daar was ’n dispuut oor ’n stel spaarsleutels vir ’n eiendom wat Ferreira en sy lewensmaat by die Oosthuysen-egpaar gehuur het. Die argument het daartoe gelei dat Ferreira vir Oosthuysen gewelddadig neergestamp het. In die hof het hy aangevoer dat hy uit selfverdediging opgetree het. Oosthuysen het ’n wond aan die agterkant van haar kop opgedoen, asook ’n gekraakte linkerpols en ernstige kneusplekke aan haar heup.
Tydens die vonnisoplegging het die landdros gesê bejaardes moet teen aanvalle en mense soos Ferreira beskerm word. “Jy kan jou in geen leeftyd van hierdie skuld kwytskeld nie. Jy moet die trauma, die pyn en die lyding verstaan wat jy die klaagster en haar familie aangedoen het. Die ongelukkige gevolg van jou optrede is dat jy nou ’n veroordeelde misdadiger is en vir jouself ’n kriminele rekord verwerf het, ’n curriculum vitae in ’n misdadiger wees,” het Olivier gesê.
Die landdros het ook verwys na die regering se pogings om geslagsgebaseerde geweld te bekamp, insluitend die jaarlikse 16 dae van aktivisme teen geweld teen vroue en kinders. Sy het benadruk dat die howe ’n rol het om te speel om die kwesbaarstes in die samelewing teen sulke leed te beskerm.
As verswarende omstandighede het die staat ’n Facebook Live-video ingedien wat Ferreira in 2021 op sy sosiale media geplaas het. Daarin vertel hy van ’n onverwante voorval waar hy na bewering ’n bejaarde man aangerand het. “That uncle was telling me sh*t, and I just f**ed him up with a glass. It was kinda fun.” Die hof het gehoor dat Ferreira sedert sy skuldigbevinding sy werk verloor het en nou by sy ma woonagtig is.
Met die oorweging van die getuienis het Olivier gesê “die feit dat hy spog op sosiale media, gekombineer met die feit dat dit ook ’n bejaarde slagoffer was, laat verswarende omstandighede toe wat regters gebruik om strawwe streng op te lê. Ons howe het in die algemeen ’n plig om gevalle van geweldsmisdade teen ouer persone te veroordeel.”
Barry Bateman, woordvoerder van die eenheid, sê sake van geslagsgebaseerde geweld is van die ernstigste aangeleenthede wat deur die privaatvervolgingseenheid hanteer word. “Hoewel die privaatvervolgingseenheid van mening was dat gevangenisstraf gepas sou wees, gegewe die slagoffer se ouderdom, broosheid en die aard van die beserings wat sy opgedoen het, bied die skuldigbevinding en die rol wat die eenheid gespeel het tog ’n mate van gemoedsrus dat daar gevolge was vir ’n man wat ’n bejaarde vrou aangerand het.”
Die eenheid het sy waardering uitgespreek teenoor aanklaer Lungile Mazibane, wat tydens die verhoor na ’n ander hof verplaas is, maar haarself beskikbaar gestel het om te verseker dat die saak afgehandel word.
