Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Mediaverklarings

Begroting 2026: Belastinglas bly steeds groot en belastingbasis te klein – AfriForum

DeurAfriForum 25/02/202625/02/2026

Klankgreep: Louis Boshoff (Afrikaans)

Klankgreep: Louis Boshoff (Engels)

AfriForum waarsku dat die land se belastingbetalers steeds onder geweldige druk verkeer ondanks verskeie nugtere begrotingsbesluite wat Enoch Godongwana, minister van Finansies, vandag tydens sy begrotingsrede in Kaapstad aangekondig het.

Die burgerregteorganisasie beskryf die afskaffing van R20 miljard se belastingverhogings wat voorlopig in die Mei 2025-begroting ingesluit was, en die aanpassing op belastingkerwe en -kortings vir persoonlike inkomstebelasting ooreenkomstig inflasie as nugtere besluite. Die verhoging van die drempel vir verpligte BTW-registrasie vir kleinsakeondernemings van R1 miljoen na R2,3 miljoen is ook ’n welkome stap. AfriForum maan egter dat die privaat sektor, gemeenskappe en individuele belastingbetalers meer erkenning moet kry vir die relatief beter fiskale posisie wat hierdie jaar aangekondig is.

Volgens Louis Boshoff, AfriForum-woordvoerder, is verhoogde alkohol- en tabakaksyns nutteloos as dit nie gepaard gaan met beter wetstoepassing nie. “Hulle noem dit ‘sondebelasting’, maar die ware sondaars ontduik dié belasting. Intussen was totale belastinginkomste weer hoër as verwag omdat wetsgehoorsame burgers getrou betaal.”

Boshoff sê verder dat die minister sommige suksesse voortydig wil vier. “Die Tesourie maak optimistiese projeksies oor ekonomiese groei en verminderde staatskuld en wens dan hulself geluk asof die projeksies reeds gerealiseer het. Buitendien is selfs die projeksies van die ekonomiese groei laer as die globale gemiddeld. Die verbetering wat tans aangeteken word, is boonop eerder grootliks te danke aan ’n veerkragtige privaat sektor as die Tesourie se fiskale se beleid.”

Volgens AfriForum is sommige afdelings van die begrotingsrede ’n implisiete erkenning van staatsverval en mislukkende beleid. “Verhoogde besteding aan gesondheid, onderwys en vervoerinfrastruktuur gaan nie op sigself die swak toestand van hierdie departemente verbeter nie – die geld moet eerder reg aangewend word. ’n Goeie begroting kan nie opmaak vir swak regering nie,” sluit Boshoff af.