|

AfriForum verwelkom regering se plan om onwettige mynbou strafregtelike misdryf te verklaar

Jacques Broodryk (Afrikaans)

AfriForum verwelkom die regering se voorgestelde wysigings aan wetgewing wat onwettige mynbou uitdruklik as ’n strafbare misdryf sal verklaar. Die organisasie meen dat dié stap al lankal moes plaasvind en dat dit ’n belangrike leemte in die staat se stryd teen georganiseerde misdaad kan vul.

Die voorgestelde wysigings maak voorsiening vir gevangenisstraf van tot 30 jaar en boetes van tot R100 miljoen. Dit is ’n belangrike verbetering op die huidige situasie, waar mense wat by onwettige mynbou betrokke is, dikwels van minder ernstige oortredings soos betreding aangekla word.

“Dit is ’n stap in die regte rigting. Dit is absurd dat onwettige mynbou tot nou toe nie behoorlik as ’n misdryf uit eie reg hanteer kon word nie. Die staat moet nou wys dat hierdie nuwe wetgewing nie bloot nog ’n stuk papier sal wees nie, maar dat dit daadwerklik toegepas sal word,” sê Jacques Broodryk, AfriForum se hoofwoordvoerder vir Gemeenskapsveiligheid.

AfriForum is veral bekommerd oor die georganiseerde strukture agter onwettige mynbou. Die probleem begin en eindig nie by die persoon wat ondergronds myn nie. Daar is finansiers, werwers, verskaffers van toerusting, kopers en ander rolspelers wat die onwettige bedryf aan die gang hou.

“Die staat moet die hele waardeketting teiken. Dit is sinloos om slegs die sigbare persoon ondergronds in hegtenis te neem terwyl diegene wat hierdie bedryf finansier en daaruit voordeel trek, onaangeraak bly. Die geldspoor moet gevolg word en die mense agter die sindikate moet vervolg word,” sê Broodryk.

Die impak van onwettige mynbou kan egter nie slegs aan verlore inkomste gemeet word nie. Gemeenskappe, plase, waterbronne en infrastruktuur word deur hierdie bedrywighede beskadig. In Limpopo het inwoners en boere in gebiede soos Kuschke, Ysterberg en Eerstegoud gesê dat gewapende onwettige mynwerkers hul plase beskadig en water besoedel, terwyl hul landboubedrywighede en bestaansmiddele bedreig word. In Johannesburg het die metro gewaarsku dat onwettige ondergrondse mynbou tot sinkgate, ineenstortings, beskadigde infrastruktuur en die sluiting van ondernemings gelei het. In sommige gebiede is ondergrondse holtes van tot 22 meter diep geïdentifiseer.

“Dit gaan dus nie net oor goud, platinum of ander minerale wat gebuit word nie. Dit gaan oor mense se plase, huise, water, paaie en veiligheid. Wanneer ’n gemeenskap se grond uitgegrawe en sy infrastruktuur beskadig word, kan ons nie langer voorgee dat dit bloot ’n geringe oortreding is nie,” sê Broodryk.

Die menslike koste van onwettige mynbou is ewe duidelik. Op 10 Augustus 2026 is minstens 14 vermeende onwettige mynwerkers dood toe ’n verlate mynhoop naby Rustenburg ineengestort het. Nog agt mense is beseer. AfriForum meen egter dat nuwe wetgewing slegs ’n verskil sal maak indien dit deur beslissende wetstoepassing opgevolg word.

“Ons verwelkom die regering se besluit, maar nou moet optrede volg. Die Suid-Afrikaanse Polisiediens (SAPD) en vervolgingsgesag moet oor die vermoë beskik om hierdie sindikate te ondersoek, hul geldvloei bloot te lê en die mense aan die bopunt van die bedryf voor die hof te bring. Daar moet ook opgetree word teen staatsamptenare wat onwettige mynbou deur korrupsie moontlik maak,” sê Broodryk.

AfriForum sal die wetgewende proses fyn dophou en die regering aan sy beloftes hou. “Onwettige mynbou is georganiseerde misdaad en moet as sodanig hanteer word. AfriForum verwelkom dus hierdie stap, maar Suid-Afrikaners het nie nog beloftes nodig nie. Hulle het wetstoepassing, vervolgings en sigbare resultate nodig,” sluit Broodryk af.

Word ’n lid

Maak ’n donasie

Soortgelyke plasings

#OnsSalSelf