Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Interkulturele samewerking | Mediaverklarings

AfriForum betuig medelye met afsterwe van nkosazana Nomakhosazana Stokwe

DeurAfriForum 10/08/202610/08/2026

AfriForum het met leedwese kennis geneem van die afsterwe van nkosazana (prinses) Nomakhosazana Stokwe, suster van nkosi (senior tradisionele leier) Zweloxolo Stokwe en adjunk-sekretaresse van die Stokwe Ndlela- koninklike familie van die AmaQwathi- tradisionele gemeenskap van Cala in die Oos-Kaap. Nkosazana Nomakhosazana is gisteroggend (9 Augustus) ná ’n lang siekbed oorlede.

Volgens Barend Uys, hoof van Interkulturele verhoudings en samewerking by AfriForum, sal nkosazana Noma, soos sy bekend was, onthou word vir haar toegewyde werk om die lewe van almal in haar gemeenskap te verbeter.

“Nkosazana Noma het haar nkosi, die koninklike familie en gemeenskap met onwrikbare toewyding gedien. Sy het die deure vir AfriForum oopgemaak om in samewerking met nkosi Zweloxolo en die Adopt-A-Village Landelike Voedselsekerheidsinisiatief ’n verskil in die Mtingwevu-gemeenskap, buite Cala, te maak. Ons is haar ewig dankbaar daarvoor. Wat sy ook al gedoen het, het sy met geesdrif gedoen soos vir die Here en nie vir mense nie, soos wat daar geskryf staan in Kolossense 3:23. Sy was hierdeur vir ons, as haar broers en susters in Christus, ’n navolgenswaardige voorbeeld,” sê Uys.

“Die beste manier waarop ons nkosazana Noma se nalatenskap kan eer, is om die goeie werk wat sy gedoen het, te laat voortleef. Ons sal dit na die beste van ons vermoë probeer doen. AfriForum dra sy innige meegevoel aan die Stokwe Ndlela- koninklike familie en die AmaQwathi- tradisionele gemeenskap oor. Ons bid vir vertroosting vir nkosi Zweloxolo, die koninklike familie, die AmaQwathi-kultuurgemeenskap en almal wat deur nkosazana Noma se lewe geraak is,” sluit Uys af.