Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

NERSA moet nou sokkies optrek en hou by hof se nuwe tydlyne vir munisipale kragtariewe

Deidré Steffens (Afrikaans)

Deidré Steffens (Engels)

AfriForum doen ’n beroep op die Nasionale Energiereguleerder van Suid-Afrika (NERSA) om te hou by die nuwe vasgestelde tydlyne vir munisipale kragtariefaansoeke soos vandag bekragtig in ’n hofbevel. Dié beroep volg ná NERSA se dringende aansoek om ’n vorige hofbevel – waarin nuwe, billike tydlyne vir dié proses vasgestel is – te laat hersien, gister aangehoor. Die aansoek is gister aangehoor en vandag gewysig deur ’n bevel met geringe aanpassings aan die tydlyne.

Die burgerregteorganisasie benadruk dat versuim om by dié nuwe tydlyne te hou ernstige druk op munisipaliteite se begrotingsprosesse, dienslewering en uiteindelik verbruikers kan plaas.

NERSA se dringende aansoek om die hofbevel rakende die tydlyne vir munisipale elektrisiteitstariefprosesse te wysig, is gister in die Noord-Gautengse Hooggeregshof in Pretoria aangehoor.

AfriForum het die hof in Augustus verlede jaar genader om NERSA se openbaredeelnameproses wat vir die instelling van die 2025/2026-boekjaar se munisipale kragtariewe gevolg is, ongeldig te laat verklaar weens ernstige prosedurele gebreke. AfriForum het ook die hof versoek om ’n interdik uit te reik om gespesifiseerde tydlyne vir toekomstige openbaredeelnameprosesse te verseker. Daarvolgens is versoek dat duidelike datums vir die goedkeuring van munisipale tariefverhogingsaansoeke vasgestel moet word. Die Hooggeregshof het op 31 Oktober in AfriForum se guns beslis en bepaal dat NERSA se goedkeuring vir die implementering van munisipale kragtariewe sonder die gebruik van behoorlike kostestudies en openbaredeelnameprosesse, ongrondwetlik is. Teen Desember is AfriForum se aansoek om ’n interdik om die implementering van spesifieke tydlyne vir alle toekomstige munisipale kragtariefaansoeke toegestaan. Dit is dié tydlyne wat NERSA nou vir die 2026/2027-boekjaar laat hersien het.

Hoewel AfriForum nie die aansoek formeel teenstaan nie, het die organisasie ernstige voorbehoude daaroor uitgespreek en meer werkbare sperdatums voorgestel.

Sien die onderstaande tabel vir ’n uiteensetting van die aanpassings aan die tydlyn.

Benewens die bevel rakende die aangepaste tydlyne, het die hof ook vandag bepaal dat enige munisipaliteit wat glo dat die gewysigde tydlyne steeds praktiese probleme inhou, ’n dringende aansoek mag bring om teen 17 Maart aangehoor te word vir verdere wysiging op die spesifieke munisipaliteit se tydlyne.

Volgens Deidré Steffens, raadgewer vir Plaaslikeregeringsake by AfriForum, moet NERSA die tyd wat nou gegun is om die proses doeltreffend en in die belang van alle partye aan te pak, benut en nie toelaat dat onverantwoordelike bestuur van die proses die aansoekproses – soos in die verlede – kniehalter nie. “AfriForum sal die implementering van die gewysigde tydlyne noukeurig monitor om te verseker dat daar aan die hof se voorskrifte voldoen word. Ons sal ook toesien dat die aangepaste tydlyne steeds die beginsels handhaaf wat in die oorspronklike uitspraak bevestig is. Die aanvanklike hofbevel was daarop gemik om sekerheid, deursigtigheid en betekenisvolle openbare deelname aan die tariefgoedkeuringsproses te herstel. Hoewel die tydlyne nou vir die 2026/2027-boekjaar aangepas is, bly dit noodsaaklik dat die proses wettig verloop en dat munisipaliteite en elektrisiteitsverbruikers nie benadeel word nie,” sluit Steffens af.

Uiteensetting van tydlyne soos goedgekeur deur die hof in Desember 2025, sperdatums volgens NERSA se jongste aansoek, AfriForum se aangepaste tydlyne na aanleiding van die jongste NERSA-aansoek en die goedgekeurde sperdatums volgens die bevel gelewer op 20 Februarie 2026.

	Sperdatum volgens Desember-hofbevel	NERSA-aansoek	AfriForum-voorstel	Nuwe sperdatum volgens Februarie-hofbevel
Kennisgewing oor nuwe grootmaat-aankooptarief	31 Januarie	13 Maart	–
Kennisgewing aan munisipaliteite om aansoeke in te dien	31 Januarie	17 April	–
Sperdatum vir munisipaliteite se aansoeke	20 Maart	17 April	7 April	31 Maart
Finalisering van openbare-deelnameproses				21 April
Publikasie van NERSA se finale besluite	5 Mei	29 Mei	8 Mei	11 Mei