Skaapdief aangekeer, danksy nuwe AfriForum-kamera in Bo-Karoo
AfriForum se Bo Karoo-tak het vandag in die vroeë oggendure ’n beduidende rol gespeel in die arrestasie van ’n vermeende skaapdief op ’n plaas buite Luckhoff. Dié sukses volg slegs enkele dae nadat die tak op 20 Augustus ’n platform met ’n langafstand observasiekamera op hierdie plaas, sowat 500 meter van die boer se skaapkraal, opgerig het. Hierdie stelsel stel die gemeenskap in staat om beeldmateriaal via internetvermoë na ’n sentrale beheerkamer te stroom.
Die verdagte het sy rieme styfgeloop toe Orania Veiligheidsdienste se beheerkamer vanoggend omstreeks 01:04 opmerk dat hy besig is om twee skape aan te keer en te slag. Die voorsitter van die Bo Karoo-tak is onmiddellik daarvan verwittig. Omdat die Suid-Afrikaanse Polisiediens (SAPD) nie bereik kon word nie, is AfriForum se protospan, in samewerking met die Orania Weerheidbaarheidsvereniging se taak- en reaksiespanne, geaktiveer.
Die operasie is intussen gekoördineer deur middel van regstreekse beeldmateriaal wat na ’n spanlid se selfoon gestroom is, asook kommunikasie via tweerigtingradio’s. Drie spanne is strategies om die skaapkraal ontplooi, terwyl die verdagte se bewegings voortdurend gemoniteer is. Teen 03:10 het die verdagte, met twee gesteelde skape, in die taakspan vasgeloop en is aangekeer. Hy is saam met sy buit en ’n mes, wat hy in ’n rugsak versteek het, aan die SAPD oorhandig.
“Hierdie voorval bewys dat die stryd teen misdaad slegs gewonne is deur goeie samewerking tussen alle rolspelers en dat die doeltreffende gebruik van tegnologie as ’n magsvermenigvuldiger nie onderskat moet word nie,” sê Thomas van Dalen, AfriForum se streekshoof vir die Noord-Kaap.
AfriForum se beplanning aan hierdie langafstand observasiekamera het sowat ’n jaar gelede begin toe daar tot die besef gekom is dat normale wetstoepassingsagentskappe nie oor die vermoë beskik om die aanslag teen plaasboere – hetsy plaasaanvalle of veediefstal – die hoof te bied nie. Die takbestuur, in samewerking met die tak se struktuur vir gemeenskapsveiligheid, het gevolglik besluit om gevorderde koverte elektroniese observasietegnieke in te span om hierdie probleem te takel. ’n Projek is gevolglik geloods om die platform met ’n langafstand observasiekamera te ontwikkel. Daar word gebruik gemaak van ’n termiese kamera wat infrarooistraling opspoor en dit omskep in ’n visuele beeld wat temperatuurvariasies wys.
Van Dalen voeg by dat gekoördineerde burgerlike inisiatiewe en goed beplande operasies wat binne die raamwerk van die wet plaasvind, ’n groot deel van die oplossing vir misdaadbekamping in Suid-Afrika vorm. Hy sluit af deur te sê dat hierdie sukses hopelik die eerste van vele sal wees, en dat die konsep landswyd toegepas kan word.
