Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Gemeenskapsake Mediaverklarings | Mediaverklarings

Kommerwekkend min straatligte by Pretoria-skole deur AfriForum blootgelê

DeurAfriForum 25/08/202625/08/2026

AfriForum se Groter Pretoria-Oos-tak het onlangs met ’n veiligheidsoudit begin wat bepaal hoe goed die straatbeligting rondom skole in onder meer Garsfontein, Waterkloof, Elarduspark en Constantiapark is. Die voorlopige bevindings is dat slegs een van die ses skole wat reeds geoudit is oor voldoende werkende straatbeligting beskik. Altesaam drie van die skole het enkele straatligte wat werk, terwyl die res geen werkende straatbeligting het nie.

Volgens Fanus Johnson, voorsitter van AfriForum se Groter Pretoria-Oos-tak, skep swak straatbeligting onnodige veiligheidsrisiko’s vir almal wat van die skole gebruik maak. “Skole is nie net gedurende skoolure bedrywig nie. Sportbyeenkomste, kultuuraktiwiteite en ander funksies vind gereeld saans plaas. Wanneer strate rondom skole in donkerte gehul is, stel dit leerders, ouers, personeel en besoekers onnodig aan veiligheidsrisiko’s bloot. Hierdie is ’n basiese diens wat die Tshwane-metro behoort te lewer.”

AfriForum sal die oudit in die komende weke na nog sowat tien skole uitbrei voordat die volledige bevindings aan die betrokke wyksraadslede en die Tshwane Metropolitaanse Munisipaliteit voorgelê word. Die doel is om die herstel van straatligte rondom skole te bespoedig en sodoende die veiligheid van skoolgemeenskappe te verbeter.

“Ons wil graag saam met die metro werk om hierdie probleem op te los. Indien daar egter nie binne ’n redelike tyd opgetree word nie, sal AfriForum ondersoek instel na moontlike samewerking met skole se beheerliggame en ander vennote om praktiese oplossings te vind. Gemeenskappe kan nie toelaat dat swak dienslewering die veiligheid van hul kinders in gedrang bring nie,” sê Johnson.

AfriForum doen ’n beroep op inwoners om gebrekkige straatligte by die Tshwane-metro aan te meld en terselfdertyd by hul plaaslike AfriForum-tak of -buurtwag betrokke te raak om gemeenskapsveiligheid te help versterk.