AfriForum-buurtwagte slaan tande al dieper in misdaad
AfriForum se tweede landwye massapatrollie vir 2025 het die afgelope naweek weereens ’n aantal suksesse regoor Suid-Afrika behaal. Die organisasie se 177 buurt- en plaaswagte het van Vrydagaand (20 Junie) tot vroeg Saterdagoggend hul onderskeie gebiede gepatrolleer om die gemeenskap se veiligheid te verseker. Tydens dié patrollie het AfriForum onder meer ’n beduidende rol gespeel om ’n gesteelde voertuig en gesteelde vee terug te vind, met ’n aantal arrestasies gehelp en ’n voorval van huishoudelike geweld ontlont. Daarbenewens was AfriForum ook van hulp tydens ’n padblokkade en met die bestryding van brande aan die Oos-Rand.
In Vryburg, Noordwes, het die AfriForum-buurtwag tydens die vroeë stadiums van die patrollie ’n gesimuleerde voorval van ’n voertuig wat gesteel is, geoefen. Later daardie aand het die simulasie ’n werklikheid geword toe ’n gesteelde voertuig, wat vroeër op WhatsApp-groepe gerapporteer is, by ’n plaaslike Shell-vulstasie geïdentifiseer is. AfriForum se Vryburg-protospan, in samewerking met ander veiligheidsrolspelers, het die voertuig, wat in Orkney gesteel is en moontlik by ’n misdaad betrokke was, onderskep. Die Suid-Afrikaanse Polisiediens (SAPD) het vinnig gereageer en die voertuig is gekonfiskeer en na die Vryburg-polisiestasie geneem vir verdere ondersoek.
In Moreletapark in Pretoria het AfriForum-lede in samewerking met plaaslike privaat sekuriteit gewerk om ’n verdagte, wat by ’n besigheidsperseel ingebreek het, aan te keer. Die SAPD het die verdagte op die toneel in hegtenis geneem.
In Alberton aan die Oos-Rand het ’n grootskaalse padblokkade, in samewerking met wetstoepassers, tot verskeie suksesse gelei. Twee individue is in hegtenis geneem vir dronkbestuur, ’n voorval van huishoudelike geweld is opgelos en die tak se brandbestrydingspan het twee brande geblus. Meer as 150 voertuie is ook afgetrek en geïnspekteer om te verseker dat hul lisensies op datum is.
In Musina in Limpopo is ’n gesimuleerde plaasaanval geoefen om die gereedheid en koördinering van plaaslike veiligheidstrukture te bepaal.
In Delmas, Mpumalanga, het AfriForum met die SAPD se Bethal-veediefstaleenheid saamgewerk om opleiding in die voorkoming van veediefstal aan lede van die Delmas-buurtwag aan te bied. Tydens operasies by twee veeveilings is nege vermeende gesteelde koeie geïdentifiseer. Hierdie ontdekking het gelei tot nog ’n operasie waar daar op 45 gesteelde beeste afgekom is. ’n Bykomende 20 vermeende gesteelde beeste is ook op ’n aparte plek naby Hendrina gevind. ’n Verdagte is in hegtenis geneem en het die owerhede na die laaiplek geneem waar ’n voertuig en twee sleepwaens wat in die misdaad gebruik is, geleë was. Twee ander verdagtes is steeds op vrye voet.
In die Wes-Rand het gekoördineerde pogings tussen AfriForum en plaaslike wetstoepassers verskeie resultate opgelewer. Nege onwettige immigrante is in hegtenis geneem en ’n boete van R5 000 is uitgereik vir onwettige drank verkope. Daarbenewens is ses individue in hegtenis geneem vir dronkbestuur. Owerhede het ook ’n onwettige vuurwapen, twee magasyne en 12 rondtes ammunisie gekonfiskeer en ook op 15 kratte onwettige drank beslag gelê.
“Die aktiewe deelname van ons vrywilligers aan hierdie massa-inisiatief bewys weereens hoe noodsaaklik georganiseerde gemeenskapsveiligheid is in ’n land waar misdaad steeds buite beheer raak. AfriForum is trots op elke patrolleerder wat hul tyd en vaardighede opoffer om hul gemeenskappe te beskerm. Ware veiligheid begin by die gemeenskap self,” sê Jacques Broodryk, AfriForum se hoofwoordvoerder vir Gemeenskapsveiligheid.
AfriForum nooi die publiek uit om betrokke te raak deur by hul naaste buurt- of plaaswag aan te sluit. Besoek www.afriforumbuurtwag.co.za vir meer inligting.
