Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Uitspraak voorbehou in AfriForum-saak oor voortslepende kragprobleme op Rustenburg

Klankgreep: Deidré Steffens (Afrikaans)

Die Gautengse Hooggeregshof in Pretoria het uitspraak voorbehou in AfriForum se saak teen die Rustenburg Plaaslike Munisipaliteit, die munisipale bestuurder en die Nasionale Energiereguleerder van Suid-Afrika (NERSA) oor die voortslepende probleme rakende kragvoorsiening in die munisipale gebied.

Die saak is op 28 en 30 Mei en weer op 26 Junie aangehoor nadat AfriForum in 2023 hofstukke aan die betrokkenes beteken het. Slegs die munisipaliteit en die munisipale bestuurder het die saak teengestaan, terwyl NERSA, wat dié munisipaliteit se nakoming van sy lisensievoorwaardes rakende kragvoorsiening moet reguleer, nie het nie.

AfriForum het die hof genader ná jare se kragvoorsieningsprobleme op Rustenburg, wat volgens AfriForum voortspruit uit die verwaarlosing en onvoldoende instandhouding van die plaaslike kragnetwerk. Voordat AfriForum die hof genader het, het die burgerregteorganisasie probeer om met die munisipaliteit en NERSA te skakel rakende die kwessie van kragvoorsiening, maar amptenare het nie waardevolle samewerking of haalbare oplossings gelewer nie.

“Die munisipaliteit, as ’n lisensiehouer van NERSA, het sekere norme en lisensiestandaarde om na te kom en NERSA moet dit reguleer. Wanneer sy lisensiehouers nie aan die standaarde voldoen nie, moet die energiereguleerder verbruikers beskerm deur in te gryp. In hierdie geval het NERSA jare lank versuim om in te gryp en toegelaat dat die situasie verder versleg,” sê Deidré Steffens, adviseur vir Plaaslikeregeringsake by AfriForum.

In sy aansoek het AfriForum die hof versoek om verligting op drie sleutelgebiede toe te staan. Eerstens versoek AfriForum ’n verklarende bevel dat NERSA versuim het om sy statutêre verpligtinge na te kom om die munisipaliteit se nakoming van verspreidingstandaarde te monitor en af te dwing. Tweedens het AfriForum die hof versoek om die energiereguleerder te verplig om sy afdwingingsbevoegdhede kragtens toepaslike wetgewing uit te oefen en alle nodige stappe te doen om nakoming van die Rustenburg-munisipaliteit te verseker. Derdens het AfriForum spesifiek versoek dat NERSA verplig word om die munisipaliteit se mislukkings te ondersoek, opdragte vir remediërende maatreëls uit te reik, die implementering van daardie maatreëls te verseker en die munisipaliteit se voortgesette nakoming te monitor om toekomstige kragonderbrekings te voorkom.

“Dit is jammer dat organisasies soos AfriForum munisipaliteite hof toe moet sleep om aan wetgewing en gestelde lisensievoorwaardes te voldoen. AfriForum probeer voortdurend om buite die hof met munisipaliteite te skakel om basiese dienslewering vir inwoners te verseker, maar die burgerregteorganisasies se talle oproepe het op dowe ore geval. AfriForum sal voortgaan om druk op regeringsfere te plaas om basiese dienste aan gemeenskappe te lewer,” sluit Steffens af.