Senior advokaat staan tereg op aanklag van poging tot moord ná mislukte poging om NVG-besluit om te keer
Die Hooggeregshof in Pretoria het bevind dat daar “redelike en waarskynlike gronde” is om adv. Roelof du Plessis, senior advokaat, te vervolg vir sy rol in ’n padwoedevoorval in 2023, waartydens sy vermeende slagoffer, Conrad Pretorius, oop meswonde aan sy nek en been opgedoen het. Die hof het voorts Du Plessis se bewering verwerp dat die besluit om hom te vervolg die gevolg was van druk van AfriForum se privaatvervolgingseenheid, wat die klaer (Pretorius) verteenwoordig. Regter Sulet Potterill het verlede week uitspraak gelewer, wat hopelik ’n einde bring aan meer as ’n jaar se regstryd deur Du Plessis om te verhoed dat hy in die hof moet verskyn.
Die saak is op 6 Augustus 2026 aangehoor. AfriForum was nie ’n party tot Du Plessis se aansoek teen die Nasionale Direkteur van Openbare Vervolgings (NDOV) se kantoor nie, maar die uitkoms daarvan het ’n direkte invloed op die eenheid se kliënt.
In Augustus 2025 het die Nasionale Vervolgingsgesag (NVG) besluit om Du Plessis van poging tot moord aan te kla, nadat die eenheid suksesvolle vertoë gerig het. Die NVG het Pretorius aanvanklik van aanranding en kwaadwillige saakbeskadiging aangekla, maar het sy besluit hersien ná vertoë wat die eenheid namens hom gerig het. In ’n weldeurdagte beslissing het adv. Shamila Batohi, die destydse NDOV, gesê dat Du Plessis vir poging tot moord vervolg moet word. “Die kernvraag in hierdie saak is wie onregmatig opgetree het deur wie aan te val, en in dié verband, of adv. Du Plessis in noodweer opgetree het toe hy mnr. Pretorius twee keer met sy knipmes gesteek het,” het sy gesê.
“Dit is my deurdagte beslissing dat die prima facie-bewyse en die waarskynlikhede wat uit die saak as geheel na vore kom, bewys dat adv. Du Plessis nie in noodweer opgetree het toe hy mnr. Pretorius met die mes aangeval het nie; trouens, adv. Du Plessis het onregmatig opgetree toe hy mnr. Pretorius twee keer gesteek het. Verder toon die aard van die steekwonde wat mnr. Pretorius opgedoen het prima facie aan dat adv. Du Plessis die misdaad van poging tot moord gepleeg het toe hy mnr. Pretorius gesteek het,” het Batohi beslis.
In haar uitspraak verlede week moes Potterill bepaal of Batohi se besluit om Du Plessis, eerder as Pretorius, te vervolg, objektief rasioneel was op grond van die feite. “Volgens sy eie weergawe het Du Plessis ’n mes gebruik om ’n ongewapende man wat hom aangeval het, af te weer, en hy het sodoende ernstige beserings toegedien. Du Plessis se mediese verslag toon dat hy self slegs geringe beserings opgedoen het. Die opsetlike gebruik van ’n mes teen ’n aanvaller wat geen wapen het nie, is rasionele feite waarop Batohi haar besluit kon baseer. Die wonde was aan die nek en die bobeen, wat aanleiding gee tot die afleiding dat dolus eventualis teenwoordig was ten opsigte van poging tot moord. Ek is tevrede dat die besluit objektief rasioneel was en verband gehou het met die doel waarvoor die bevoegdheid verleen is,” het Potterill in haar uitspraak gesê.
Die eenheid se woordvoerder, Barry Bateman, sê hulle verwelkom die uitspraak en erken die goed gemotiveerde argumente wat deur die NVG se regsverteenwoordiger, adv. Nazeer Cassim, en die kantoor van die staatsprokureur se span aangevoer is. “Regter Potterill het bevestig wat die eenheid van die begin af gesê het: adv. Du Plessis het ’n saak om te beantwoord. Ons kliënt en ons veral neem kennis van die bevinding dat daar, volgens Du Plessis se eie weergawe, redelike en waarskynlike gronde is om hom te vervolg, en dat die besluit van die voormalige NDOV, adv. Batohi, – dat Du Plessis eerder as Pretorius vervolg moet word – objektief rasioneel was.
“Die eenheid verwelkom verder die bevinding dat AfriForum se uitgesproke standpunte oor die saak nie daartoe gelei het dat Batohi bevooroordeeld opgetree het toe sy haar besluit geneem het nie. Hierdie kantoor het nog altyd bloot versoek dat die NVG, in ooreenstemming met sy plig, optree sonder vrees, guns of vooroordeel; ons glo dat dit in hierdie geval gedoen is. Ons sal nou wag dat die NVG strafregtelike verrigtinge instel en verseker dat Pretorius, die klaer, gereed is om te getuig,” sê Bateman.
Bateman sê die eenheid sal voortgaan met sy gesprekke met die NVG – nie net met betrekking tot hierdie saak nie, maar ook oor die afsonderlike crimen injuria-sake teen die politici Fikile Mbalula en Julius Malema. Die staat het besluit om albei politici in die Johannesburgse Landdroshof te vervolg op aanklagte wat uit die Jaco Pieterse-sake voortspruit.
AGTERGROND
Die saak hou verband met ’n voorval op 1 Augustus 2023, waartydens Pretorius en sy vrou in Menlo Park, Pretoria, gery het. Hulle het Du Plessis, ’n lid van die advokatekamers in Pretoria, by ’n kruising teëgekom waar die verkeersligte buite werking was. Daar word beweer dat ’n woordewisseling plaasgevind het wat daartoe gelei het dat Du Plessis Pretorius ongeveer vyf kilometer ver deur die strate van die voorstad gejaag het voordat hy hom na bewering in ’n doodloopstraat vasgekeer het. Daar word verder beweer dat Pretorius en Du Plessis uit hul voertuie geklim het en ’n konfrontasie plaasgevind het. Pretorius beweer dat Du Plessis hom met ’n skerp voorwerp in die nek gesteek het, waarna ’n worsteling ontstaan het. Hy is ook in sy been gesteek. Pretorius het daarin geslaag om terug te klim in sy motor en na die naaste hospitaal te ry vir behandeling.
Pretorius is in die hospitaal opgeneem met lewensgevaarlike beserings. Terwyl hy in die hospitaal was, het hy ’n strafregtelike klag van poging tot moord teen Du Plessis ingedien, net om uit te vind dat die advokaat ook ’n strafregtelike klag teen hom aanhangig gemaak het.



