Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

SANRAL-beleid wek kommer oor uitbreiding van staatsbeheer oor grondgebruik langs nasionale paaie

Klankgreep: Marais de Vaal (Afrikaans)

Klankgreep: Marais de Vaal (Engels)

AfriForum waarsku dat die Suid-Afrikaanse Nasionale Padagentskap (SANRAL) se konsepwysigings aan sy Rus- en Diensfasiliteite- (RDS-)beleid dié agentskap se magte onwettig kan uitbrei en privaat grondeienaars, boere en ondernemings wat teenaan nasionale paaie geleë is, negatief kan beïnvloed. Terwyl die konsepbeleid voorgehou word as ’n raamwerk om padkantinfrastruktuur te moderniseer, insluitend om voorsiening te maak vir die ontwikkeling van elektriese voertuiglaaistasies en alternatiewe brandstoffasiliteite, is AfriForum van mening dat die implikasies daarvan veel verder strek as tradisionele rusplekke en vulstasies.

In terme van die voorgestelde wysigings sal SANRAL gemagtig word om te bepaal waar fasiliteite langs nasionale paaie geleë mag wees, watter tipe ondernemings bedryf mag word, hoe ver uitmekaar dit moet wees en onder watter voorwaardes toegang toegestaan of verander mag word. Dit is funksies wat tipies binne die jurisdiksie van munisipaliteite en omgewingsowerhede val, wat vrae laat ontstaan oor die wettigheid van SANRAL om so ’n rol aan te neem.

Wat veral kommerwekkend is, is die impak op privaat grondeienaars, boere en landbou-ondernemings. Baie landelike ondernemings is afhanklik van toegang tot nasionale paaie vir hul ekonomiese lewensvatbaarheid, insluitend padstalle, toerisme-ondernemings, verblyf en kleinhandelaktiwiteite. Volgens AfriForum, kan die voorgestelde beleid hierdie aktiwiteite beperk, toekomstige ontwikkelingsgeleenthede beperk en addisionele regulatoriese en finansiële beperkings oplê.

AfriForum voer verder aan dat die konsepbeleid ook ’n potensiële botsing van belange skep. SANRAL sal nie net ontwikkelings reguleer en goedkeur nie, maar ook kommersieel deelneem deur sy eie grond vir soortgelyke fasiliteite te verhuur. Dit wek kommer oor billikheid en mededinging, aangesien SANRAL terselfdertyd as reguleerder en markdeelnemer sal optree.

“Hierdie is nog ’n voorbeeld van die regering se sentralistiese neigings. Die konsepbeleid blyk verder te gaan as SANRAL se wetlike mandaat en kan verreikende beheer oor grondgebruik en kommersiële aktiwiteite langs nasionale paaie instel,” sê Marais de Vaal, AfriForum se raadgewer vir Omgewingsake.

Terwyl die oorgang na elektriese mobiliteit en alternatiewe brandstowwe ’n belangrike en noodsaaklike ontwikkeling is, hou AfriForum vol dat dit nie ten koste van eiendomsregte, wettige administratiewe prosesse en billike ekonomiese deelname moet gaan nie.

AfriForum beoog om kommentaar op die konsepwysigings in te dien en het die Departement van Vervoer versoek om die openbare kommentaartydperk te verleng vir genoegsame tyd vir betekenisvolle konsultasie met betrokke partye of vir ’n deeglike regs- en beleidsanalise. Ongeag die Departement se terugvoer op die organisasie se versoek, kan die publiek steeds op AfriForum se betrokkenheid by die proses staatmaak, wat sal toesien dat enige finale beleid wettig, proporsioneel en in die openbare belang is.