Planne vir omstrede steenkoolmyn naby Krugerwildtuin herroep danksy openbare teenkanting
Die omstrede voorgestelde mynaansoek naby die suidelike grens van die Krugerwildtuin is laat vaar. AfriForum beskou die terugtrekking van hierdie gebrekkige aansoek as die resultaat van jarelange ondersoekwerk en openbare druk van die organisasie self, plaaslike gemeenskappe, grondeienaars en ander gemeenskapsorganisasies. AfriForum veg al sedert 2019 teen beplande mynbou-aktiwiteite by die Krugerwildtuin.
AfriForum het ’n formele skriftelike kennisgewing van Kimopax, die omgewingsassesseringspraktisyn wat vir Tenbosch Mining optree, ontvang, wat bevestig dat die aansoek onomwonde teruggetrek is. In sy kennisgewing, gedateer 12 Desember 2025, bevestig Kimopax dat die mynreg-, omgewingsmagtiging-, afvalbestuurslisensie- en watergebruikslisensie-aansoeke herroep word, dat alle verwante prosesse beëindig word, en dat geen besluit deur die bevoegde owerheid oor hierdie aansoeke geneem sal word nie. Alle openbare deelname wat aan hierdie aansoek gekoppel is, is ook met onmiddellike effek gestaak.
Hierdie uitkoms volg na jare van volgehoue teenkanting deur AfriForum, wat ernstige prosedurele mislukkings, onwettige gedrag en ’n gebrek aan deursigtigheid dwarsdeur die proses blootgelê het. Die myn sou ’n ekologies sensitiewe gebied langs Suid-Afrika se belangrikste nasionale park teiken, terwyl die omgewingsimpakstudie (OIS)-proses vol gebreke was. Dit sluit in, herhaalde mislukkings om foute in verskeie OIS-weergawes reg te stel, die uitsluiting van geregistreerde belanghebbendes, ontbrekende of onvoldoende spesialisstudies, die aanhaling van verouderde regulasies, en ongegronde aansprake op grondeienaars se toestemming. Soms het aktiwiteite ook klaarblyklik sonder die nodige magtigings voortgaan.
“Ons het deurgaans gewaarsku dat hierdie aansoek fundamenteel gebrekkig is en nie met oppervlakkige veranderinge verbeter kon word nie,” sê Marais de Vaal, AfriForum se adviseur vir Omgewingsake. “Die herroeping van hierdie aansoek wys wat bereik kan word wanneer gemeenskappe weier om geboelie te word en daarop aandring dat wetlike vereistes nagekom word.”
AfriForum het sy prokureurs opdrag gegee om skriftelike bevestiging van die departement van Minerale Hulpbronne en Energie aan te vra dat die aansoek inderdaad teruggetrek is. Hierdie stap is nodig gegewe ’n vorige geval waar dieselfde myn se vorige omgewingspraktisyn aangedui het dat die aansoek teruggetrek is, terwyl hulle agter die skerms daarmee voortgegaan het.
AfriForum beklemtoon dat die burgerregteorganisasie nie die mynbouaansoek bloot ter wille van teenkanting teengestaan het nie. Die hewige teenkanting het gegaan oor die beskerming van ’n nasionale natuur- en erfenisskat, die beskerming van gemeenskappe se regte en die handhawing van omgewingswetgewing, tot voordeel van die samelewing as geheel.
Die organisasie doen ’n beroep op die regering om op te hou om mynbouaansoeke in ekologies sensitiewe buffersones te oorweeg en te verseker dat toekomstige aansoeke vanuit die staanspoor aan strenger toesig onderwerp word. AfriForum waarsku dat gemeenskappe waaksaam moet bly, omdat hierdie saak bewys dat aanspreeklikheid dikwels slegs deur volgehoue openbare druk afgedwing word.
