Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Ons vir jou-musiekspel roer gehore by AfriForum Teater; openingsnaweek reeds uitverkoop

Die opening van die musiekspel Ons vir jou by die AfriForum Teater het die gehoor gisteraand betower met ’n kragtige produksie wat die rou menslike ervarings van die Tweede Vryheidsoorlog opreg en respekvol na die verhoog bring. Dié musiekspel, met bekendes soos Bok van Blerk (as genl. Koos de la Rey) en Nadia Beukes (as Nonnie de la Rey), is vanjaar vir die eerste keer in bykans ’n dekade weer op die planke en is tot 24 Mei te sien by die AfriForum Teater in Pretoria.

Ons vir jou herinner die gehoor daaraan dat oorloë geen oorwinnings oplewer nie. Dit vertel die bittere verhaal van families wat uitmekaar geskeur word, gemeenskappe wat verwoes word en gewone mense wat deurentyd die swaarste dra aan die donker las van oorlog. Teen dié agtergrond wys Ons vir jou dat medemenslikheid, liefde én volharding uiteindelik swaarder weeg as enige vlag of uniform.

Volgens Salet Smith, bestuurder van AfriForum Teater, plaas die produksie voorts ook die opofferings van vorige geslagte weer in perspektief. “Dit herinner gehore aan hoe die verlede vandag nog in ons taal, kultuur en gemeenskappe voortleef. Ons vir jou is nie net ’n teaterstuk nie; dit is ’n herinnering aan die mens agter die geskiedenis – en ’n uitnodiging om met nuwe waardering na ons erfenis en mekaar te kyk.”

Gaste wat gisteraand se opening bygewoon het, beskryf Ons vir jou onder meer as “emosioneel en kragtig”, “’n storie wat jou laat dink” en “’n produksie wat lank ná die laaste noot nog by jou bly”.

Ons vir jou, uit die pen van Deon Opperman en Sean Else, en met musiek deur Johan Vorster, is ’n tydlose teaterervaring wat oud en jonk sal begeester. Dit word met trots aangebied by die AfriForum Teater. Teatergangers en geskiedenis- en musiekteaterliefhebbers word uitgenooi om dié verhaal eerstehands te kom beleef. Die openingsnaweek se vertonings is reeds uitverkoop en kaartjies vir die res van die speeltyd is beperk.