Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Gekaapte watertenkwa – én sleepwa wat byna dekade gelede gesteel is

’n Munisipale watertenkwa wat verlede week (Donderdag 20 Augustus) in eMzinoni, buite Bethal, gekaap is, is Vrydag danksy die paraatheid van AfriForum, in samewerking met plaaslike veiligheidsrolspelers en ’n privaat opsporingsmaatskappy, nagenoeg 400 km daarvandaan in Kanyamzane, buite Mbombela (Nelspruit) opgespoor. Benewens dié sukses is ’n sleepwa wat reeds in 2017 in Middelburg gesteel is, ook in besit van die verdagtes opgespoor.

Die roete van die voortvlugtendes is deur sekuriteitskameras opgetel.

Hennie Bekker, AfriForum se distrikskoördineerder vir die Mpumalanga Hoëveld, het kort ná nuus oor die kaping op Bethal bekend geraak het, met privaat beheerkamers in die streek geskakel om die vragmotor op veiligheidskameras te probeer opspoor. Die vragmotor is teen omstreeks 20:00 naby Mbombela (Nelspruit) opgemerk. AfriForum se Nelspruit-buurtwag is van die ligging van die gekaapte voertuig in kennis gestel waarna die privaat opsporingsdiens Netstar verdere ondersoek ingestel het. Buurtwaglede is ook opdrag gegee om die vragmotor te stop en verdagtes aan te keer indien dit opgemerk word.

Netstar het die vragmotor suksesvol herwin.

Navorsing onderneem deur Tracker, een van grootste voertuigopsporings- en diefstalherwinningsmaatskappye in die land, het Mpumalanga in 2025 as ’n nuwe brandpunt van kapings van veral besigheidsvoertuie en -vragmotors geïdentifiseer.

“Mpumalanga is, vanweë sy ligging teenaan Mosambiek, ’n kwesbare teiken vir kapings en die provinsie se padnetwerk bied ’n ideale ontsnappingsroete vir misdadigers om gesteelde voertuie oor die grens te neem. ’n Groter bewussyn van die provinsie se ‘swakpleke’ wat dit vatbaar en aanloklik maak vir kapings is daarom noodsaaklik sodat proaktief opgetree kan word om hierdie misdaad te bekamp of vinnig hok te slaan wanneer misdadigers toeslaan,” verduidelik Bekker.

Die sleepwa wat nagenoeg ’n dekade gelede gesteel is, is ook teruggevind.

Volgens Bekker is die kaping moontlik die werk van ’n sindikaat wat daarop uit is om watertenktenders los te slaan.

“Die gemeenskap en privaat veiligheidsrolspelers se samewerking het ’n kritieke rol in hierdie operasie gespeel om te help toesien dat die gekaapte vragmotor vinnig teruggevind kon word. Die gebruik van tegnologie en die paraatheid van betrokkenes het boonop die deurslag gebied en beklemtoon dat misdadigers nie die oorhand in ons gemeenskap sal kry nie,” sluit hy af.