Desentralisering van polisiemagte noodsaaklik, anders sal SA onveilig bly – AfriForum
Klankgreep: Jacques Broodryk (Afrikaans)
Soundbite: Jacques Broodryk (English)
AfriForum het die Suid-Afrikaanse Polisiediens (SAPD) versoek om die afwenteling van polisiëringsmagte ernstig te oorweeg in die lig van die land se voortslepende misdaadkrisis. Dit volg op die aankondiging van Operasie Shanela 2, ’n nuwe nasionale strategie daarop gemik om geweldsmisdade in misdaadbrandpunte oor die nege provinsies heen te bekamp. Terwyl enige poging om openbare veiligheid te verbeter, ondersteun word, vestig hierdie plan weereens die aandag op die gesentraliseerde aard van Suid-Afrika se polisiëringsmodel – ’n model wat herhaaldelik daarin misluk om inwoners te beskerm.
Senzo Mchunu, minister van polisie, en Fannie Masemola, nasionale polisiekommissaris, het doelgerigte optrede belowe, insluitend die ontplooiing van bykomende speurders en interdepartementele koördinering. AfriForum is egter bekommerd oor die langtermyn-lewensvatbaarheid van hierdie strategie in die afwesigheid van betekenisvolle desentralisering van polisiëringsmagte.
“Die omvang van die land se misdaadkrisis is enorm. Daagliks word gemiddeld meer as 60 mense vermoor en 66 voertuie gekaap. Dit is nie net syfers nie – dit weerspieël die agteruitgang van wet en orde in die land. Volgens die SAPD se eie erkenning is daar nie die nodige kapasiteit beskikbaar nie, wat verder blootlê hoe gesentraliseerde polisiëring oorweldig, onderbefonds en uiteindelik ondoeltreffend geraak het om die land se unieke uitdagings die hoof te bied,” sê Jacques Broodryk, AfriForum se hoofwoordvoerder vir Gemeenskapsveiligheid.
“Werklike hervorming vereis ’n afwenteling van polisiëringsmagte sodat provinsiale en munisipale regerings – wat hand aan hand met gemeenskapsgebaseerde veiligheidstrukture werk – die wetgewende mag en hulpbronne het om hul gemeenskappe veilig te hou.”
AfriForum hou al lank voor dat die afwenteling van polisiëringsmagte ’n grondwetlike en praktiese noodsaaklikheid is. Strukture soos buurt- en plaaswagte het deurgaans beter reaksietye en verantwoordbaarheid getoon en het selfs beter resultate opgelewer as baie formele polisie-eenhede, veral in landelike en hoërisikogebiede.
AfriForum is versigtig optimisties oor die polisieminister se onlangse opmerking oor die oorweging van die uitbreiding van metropolisiebeamptes se magte. Indien dit ernstig nagestreef en effektief geïmplementeer word, sal dit ’n stap in die regte rigting wees – een wat polisiëring nader aan gemeenskappe bring.
“Die burgerregteorganisasie verwelkom enige opregte poging om misdaad te bekamp, maar sonder die afwenteling van polisiëringsmagte sal die regering nooit voor hierdie krisis uitkom nie. Plaaslike gemeenskappe moet bemagtig word om te help om beheer oor hul eie veiligheid te neem, want hulle is diegene wat elke dag met die gevolge van die staat se mislukkings saamleef,” sê Broodryk.
“Tensy strukturele hervormings toesien dat polisiëringsmagte met provinsiale en plaaslike strukture gedeel word, sal inisiatiewe soos Operasie Shanela 2 ’n tydelike reaksie op ’n nasionale krisis bly, wat permanente oplossings benodig.”
AfriForum bly daartoe verbind om saam met alle belanghebbendes te werk wat werklik die veiligheid van landsburgers prioritiseer. Die burgerregteorganisasie sal egter voortgaan om te druk vir ’n polisiëringsmodel wat werklik diegene wat die meeste deur misdaad geraak word, sal bevoordeel.
