AfriForum oorweeg regstappe oor Johannesburg-metro se omstrede verordening oor kringtelevisie
AfriForum se regspan het ’n brief aan die Johannesburg Metropolitaanse Munisipaliteit gestuur waarin die burgerregteorganisasie sy kommer uitspreek oor die verordening wat daarop gemik is om geslotekringtelevisiekameras wat op private eiendom geplaas is, asook hommeltuie, lyfkameras en outomatiese nommerplaatherkenningstelsels te reguleer en te beheer. Hierdie verordening verteenwoordig nog ’n vorm van onteiening sonder vergoeding, aangesien dit poog om beleggings en infrastruktuur wat oor die jare heen deur private veiligheidsinisiatiewe, ondernemings en gemeenskapsgroepe gebou is, te kaap. In plaas daarvan om hierdie regulasies af te dwing, behoort die metro saam met AfriForum en ander private sekuriteitsmaatskappye te werk om misdaad doeltreffend te bekamp.
Benewens die kommerwekkende implikasies van die verordening, is AfriForum veral bekommerd dat die publiek nie na behore ingelig is oor die munisipaliteit se voorneme om hierdie nuwe regulasies te implementeer nie. Om duidelikheid te kry, het AfriForum die volgende inligting van die metro aangevra:
- Bewyse van die openbare deelnameproses, insluitend:
- ’n afskrif van die amptelike kennisgewing wat gepubliseer is;
- die datum(s) waarop ’n kennisgewing, waarin openbare kommentaar op die konsepverordening gevra word, in die provinsiale staatskoerant en/of plaaslike koerante gepubliseer is;
- notule van die raadsvergadering waarin die konsepverordening oorweeg is; en
- die formele raadsbesluit wat die verordening goedgekeur het, tesame met die redes vir die goedkeuring.
- Bewyse van konsultasie met die minister van Polisie:
- AfriForum versoek bevestiging dat die minister van Polisie formeel geraadpleeg is in die opstel- en goedkeuringsproses van die verordening.
- AfriForum eis ’n afskrif van die minister se skriftelike goedkeuring om voort te gaan met die verordening.
AfriForum is gekant teen hierdie verordening, wat toegang tot geslotekringtelevisienetwerke in effek sentraliseer. Private burgers en ondernemings het juis hierdie sekuriteitstelsels geïnstalleer weens die provinsiale regering se onvermoë om openbare veiligheid te verseker. In plaas daarvan om hierdie inisiatiewe te ondersteun, wil die owerhede nou beheer daaroor neem.
Selfs al neem geslotekringtelevisiekameras beeldmateriaal van openbare ruimtes, bly dit die eiendom van die individu of entiteit wat dit geïnstalleer het. Die munisipaliteit het geen wetlike of etiese reg om onbeperkte toegang tot hierdie netwerke te eis nie. Verder werk baie private sekuriteitsnetwerke reeds in vrywillige samewerking met wetstoepassingsowerhede. Die munisipaliteit se poging om beheer oor hierdie private netwerke te neem is ongeregverdig, onnodig en ’n skending van privaatheidsregte.
’n Kommerwekkende deel van hierdie verordening is dat dit lyfkameras, wat deur private sekuriteitspersoneel en vrywilligers gedra word, insluit. Dit is heeltemal onvanpas vir die munisipaliteit om toegang tot hierdie private beeldmateriaal te eis, aangesien dit die deur oopmaak vir korrupsie, magsmisbruik en inmenging in onafhanklike ondersoeke. Private sekuriteitspersoneel werk nie vir enige regeringsfeer nie en behoort nie aan sulke indringende toesig onderwerp te word nie.
“Dit is kommerwekkend dat die munisipaliteit kies om in te meng met private veiligheidsinisiatiewe wat doeltreffend bedryf word, eerder as om sy eie wetstoepassingspogings te versterk. As die munisipaliteit nie burgers kan beskerm nie, moet hy minstens diegene wat kan, toelaat om dit te doen sonder onnodige rompslomp en inmenging,” sê Jacques Broodryk, hoofwoordvoerder vir Gemeenskapsveiligheid by AfriForum.
“In plaas daarvan om arbitrêre regulasies en beperkings in te stel, behoort die Johannesburg Metropolitaanse Munisipaliteit beter samewerking tussen wetstoepassingsowerhede en private veiligheidstrukture te bevorder. AfriForum staan gereed om die Suid-Afrikaanse Polisiediens (SAPD) en die metropolisie te ondersteun met sinvolle misdaadbekampingsinisiatiewe.”
AfriForum doen ’n beroep op almal wat geraak word om hierdie onregverdige verordening te verwerp en te eis dat die munisipaliteit private eiendomsreg respekteer. Die organisasie het die munisipaliteit tot 21 Maart tyd gegee om op sy vrae te reageer. AfriForum sal intussen voortgaan om alle wetlike weë te ondersoek om hierdie verordening uit te daag en die regte van burgers en private sekuriteitsnetwerke te beskerm.
