Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Hoë standaarde en sterk stemme by vanjaar se Dink of Sink-debatskompetisie vir universiteitstudente

AfriForum se Dink of Sink- onvoorbereide debatskompetisie vir universiteitstudente het die afgelope naweek plaasgevind. Hier het 12 spanne van onderskeidelik StudentePlein, Dagbreek-manskoshuis, die Universiteit van Pretoria en Akademia mekaar die stryd aangesê. Ná ’n naelbyter-finaal tussen StudentePlein 1 en StudentePlein 2 het laasgenoemde as wenners uit die stryd getree.

Die kompetisie het op Donderdag, 17 Julie 2025 met ’n sosiale geleentheid afgeskop waarna die spanne op Vrydag, 18 Julie in die uitdunrondes en Saterdagoggend, 19 Julie, in die uitkloprondes by Hoërskool Montana deelgeneem het. Die finaal het Saterdagaand tydens ’n galageleentheid by Akademia se Leriba-kampus plaasgevind.

Vanjaar se mosies het gefokus op politiek, regte, ekonomie, filosofie en taal. Die spanne het voor elke ronde slegs een uur gehad om hul argumente voor te berei.

“Die vlak van analitiese denke en retoriese vaardigheid wat deelnemers tydens die debatte ten toon gestel het, getuig van die uitsonderlike gehalte van akademiese debatvoering onder ons jong leiers,” sê Nicolene Müller, AfriForum se koördineerder vir Onderwys in die suidstreek.

Die finale mosie, “hierdie huis glo dat die prioritisering van Engels as lingua franca in Suid-Afrika ’n voortsetting van koloniale hegemonie is, ten koste van ware meertaligheid en kulturele regverdigheid”, het gesorg vir ’n debat wat die gehoor op die punte van hul stoele gehad het.

Megan Jones, Simoné Shirley, Isabella Burgers en Megan Kruger van StudentePlein 2 het koning gekraai, terwyl StudentePlein 1 se Righardt Pretorius, Ignus Ferreira, Neelsie van Dyk en Stephan Ehlers as naaswenners van die kompetisie aangekondig was.

Verder is daar ook vier spesiale toekennings aan verskeie studente toegeken:

C.P. Hoogenhout-prys vir beste spreker: Megan Kruger (StudentePlein 2)
Ds. S.J du Toit-prys vir retoriek: Megan Jones (StudentePlein 2)
D.F. du Toit-prys vir navorsing: Elsomé Thuynsma (Akademia 1)
Arnoldus Pannevis-prys vir die “Wooden Bell”: Hanco Stone (UPDV 3)

“Dink of Sink is meer as net ’n debatskompetisie, dit is ’n platform waar jong denkers hul stem vind, mekaar uitdaag en die toekoms van openbare debat vorm,” sluit Müller, af.

AfriForum bedank graag Kuda Foreign Exchange en Hurter Spies Ingelyf vir die onderskeie borge aan vanjaar se kompetisie.