Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Buurtwag Mediaverklarings | Mediaverklarings

AfriForum-buurtwag op De Rust slaggereed om misdaad te bekamp

DeurAfriForum 27/02/202527/02/2025

Die AfriForum-buurtwag in De Rust het vroeër vandeesweek ’n nuwe bestuur verkies en ’n strategie saamgestel om misdaad op dié Klein Karoo-dorp hok te slaan.

Die nuwe bestuur van die De Rust-buurtwag sluit Johan Olivier in, wat as buurtwagleier verkies is; Werner Alberts, operasionele spanleier; Jan Venter, inligtingspanleier; en Christel Olivier, steunspanleier.

Die reorganisering van die buurtwag volg ná ’n vlaag van inbrake en betredings in die gebied. Talle inwoners was selfs deur kwaaddoeners met klippe bestook. Die grootste oortreders in die dorp is glo kinders wat skool verlaat of weier om skool te gaan. Dié kinders bedel eerder of soek na geleenthede om te steel.

Tydens die vergadering het David Olivier, AfriForum se hoof van Gemeenskapsveiligheid vir die Suidstreek, die wetlike prosedures verduidelik om hierdie kinders vas te vat en van die strate af te kry.

“Om in die strate rond te loop en skoor te soek, plaas hierdie kinders hulself en ander inwoners in gevaar,” sê Olivier. “Die Wet op Kindergeregtigheid van 2008 maak voorsiening vir kinders wat in stryd is met die wet om die nodige hulp te ontvang om hul lewens reg te ruk en produktiewe lede van die samelewing te word. AfriForum is van voorneme om toe te sien dat hierdie prosedure gevolg word met die minderjarige kwaaddoeners op De Rust.”

Die nuwe buurtwag sal die nodige opleiding en toerusting ontvang om te verseker dat hulle toegerus is om hul take veilig uit te voer.

Raak vandag nóg by jou naaste buurtwag betrokke en help om jou gemeenskap veilig te hou. Stuur ’n e-pos na marthinus.erasmus@afriforum.co.za of skakel 081 216 9602 vir meer inligting.