Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum Sakenetwerk kring uit om nóg meer ondernemings te ondersteun

AfriForum Sakenetwerk se reikwydte brei vandeesmaand nóg verder uit met die stigting van plaaslike sakenetwerke in sowat sewe streke. AfriForum Sakenetwerk, wat entrepreneurs landwyd in staat stel om mekaar op te spoor, aan te spoor en te ondersteun, het ter voorbereiding van die nuwe plaaslike netwerke ’n aanlyngids saamgestel waarop meer as 21 000 ondernemings reeds gevind kan word.

Die doel van die stigting van plaaslike sakenetwerke is om verskillende ondernemings aan mekaar voor te stel, verwysingsbemarking te fasiliteer, gemeenskappe te rugsteun, handelsmerke te versterk en verhoudinge met ander ondernemings in ’n gebied op te bou.

Die plaaslike sakenetwerk in Potchefstroom is reeds vroeër vandeesweek (Dinsdag) gestig, waarna plaaslike sakenetwerke in die Paarl (19 Februarie) volgende week gestig gaan word, gevolg deur Somerset-Wes (20 Februarie), Durbanville (21 Februarie) en die Suid-Kaap (George, Mosselbaai en omliggende dorpe op 25 Februarie). Die plaaslike sakenetwerke in Pretoria en Bloemfontein sal onderskeidelik op 28 Februarie en 5 Maart op die been gebring word. Die stigting van hierdie netwerke vind in samewerking met AfriForum se gemeenskapstrukture plaas.

AfriForum Sakenetwerk bied verskeie voordele aan ondernemings wat by die netwerk aansluit. Behalwe vir die werkswinkels oor finansies, belasting, operasionele sake, administrasie en bemarking, wat teen ’n minimale koste deur Akademia aangebied word, word maandelikse netwerkgeleenthede ook aangebied.

Die jaarlikse Tinteltong Toekennings, wat innoverende Afrikaanse ondernemings vereer, gaan voorts ook aangepas word om ondernemings in te sluit wat deel is van die plaaslike sakenetwerk. Hierdie toekennings erken die beste diens en produkte, met wenners wat bepaal word deur stemme vanuit plaaslike netwerke en die publiek.

“AfriForum Sakenetwerk besef dat ondernemings en entrepreneurs dikwels die hart van ’n gemeenskap is – dit is die mense wat die ekonomie op eie bodem aan die gang hou. AfriForum Sakenetwerk wil daarom hierdie netwerk nóg verder uitbrei sodat elke entrepreneur in die land die geleentheid het om van hul onderneming ’n sukses te maak,” sê Sanderien van der Walt, bestuurder van AfriForum Sakenetwerk.

AfriForum Sakenetwerk nooi ondernemings uit om deel te word van hierdie netwerk, wat entrepreneurs aan elke uithoek van Suid-Afrika met mekaar verbind.

Klik hier om deel te word van AfriForum Sakenetwerk se plaaslike sakenetwerke.