AfriForum versoek dringende vergadering met polisieminister om toename in plaasaanvalle te pak
AfriForum het ’n dringende vergadering met die minister van Polisie versoek om die kommerwekkende toename in gewelddadige plaasaanvalle gedurende die feestyd te bespreek. Sedert die aanvang van Desember tot nou was daar minstens 33 plaasaanvalle en sewe plaasmoorde. In sommige gevalle is die slagoffers aangerand en selfs gemartel.
“Hierdie ontstellende tendens het landelike gemeenskappe toenemend kwesbaar gelaat en ernstige kommer oor veiligheid, voedselsekerheid en ekonomiese stabiliteit laat ontstaan,” sê Jacques Broodryk, AfriForum se hoofwoordvoerder vir Gemeenskapsveiligheid, wat die noodsaaklikheid van onmiddellike en besliste optrede benadruk.
“Die toename in plaasaanvalle is onaanvaarbaar. Hierdie aanvalle bedreig nie net menselewens nie, maar stel ook die toekoms van ons land se landbousektor in gevaar. AfriForum is daartoe verbind om saam met die Suid-Afrikaanse Polisiediens (SAPD) te werk om landelike veiligheid te versterk en te verseker dat hierdie gemeenskappe die beskerming ontvang wat hulle verdien.”
Die voorgestelde vergadering met die minister van Polisie het ten doel om beter samewerking tussen AfriForum se veiligheidstrukture en die SAPD te bewerkstellig, met die fokus op verbeterde kommunikasie, gekoördineerde operasies, kapasiteitsbou en gemeenskapsbetrokkenheid.
“AfriForum glo dat deur hulpbronne te kombineer, ’n sterk en doeltreffende raamwerk vir landelike veiligheid bereik kan word. Die burgerregteorganisasie is gereed om saam met wetstoepassingsowerhede te werk om hierdie uitdagings die hoof te bied en die lewens en lewensbestaan van Suid-Afrikaners in landelike gebiede te beskerm,” sluit Broodryk af.
