NVG versuim om eienaar van top-privaatskool te vervolg ná hy vrou en outistiese seun aanrand
Die mishandelde en geviktimiseerde ma van ’n nie-verbale outistiese tiener het haar tot AfriForum se privaatvervolgingseenheid gewend om te verseker dat haar man, ’n welgestelde en invloedryke eienaar van ’n privaatskool aan KwaZulu-Natal se noordkus, aanspreeklik gehou word vir jare se gesinsgeweld. Die privaatvervolgingseenheid verteenwoordig die ma en het ’n afskrif van die dossier aangevra om privaat vervolging te oorweeg ná die Nasionale Vervolgingsgesag (NVG) in September 2024 besluit het om nie die saak te vervolg nie. Die klaer en verdagte word nie identifiseer nie ter wille daarvan om die identiteit van hul kinders te beskerm.
Ten spyte van ’n formele versoek om ’n afskrif van die dossier kragtens die Wet op die Bevordering van Toegang tot Inligting (PAIA), het die Suid-Afrikaanse Polisiediens (SAPD) versuim om die volledige inhoud daarvan bekend te maak, die privaatvervolgingseenheid het appèl aangeteken oor hierdie besluit. Hierdie versuim kan ’n poging wees om die NVG se irrasionele besluit om nie te vervolg nie, te verberg.
Die man het na bewering sy vrou en twee seuns, insluitend sy nie-verbale, outistiese tienerseun, by verskeie geleenthede aangerand. By een so ’n geleentheid is die nie-verbale, outistiese seun met ’n plastiekpyp geslaan, wat geswelde hale op sy lyf gelaat het. Die eenheid het diep ontstellende opnames van een van die aanrandings gehoor, waarin die ma die pa smeek om die kind nie aan te rand nie. Ten spyte daarvan dat die polisie van hierdie bewyse, sowel as foto’s en mediese verslae voorsien is, het die NVG besluit om nie te vervolg nie. Die ma het deur haar prokureur formele klagtes by die SAPD ingedien vir hul swak hantering van die saak.
Die ma beweer dat sy ná jare van mishandeling die moeilike besluit geneem het om haar huwelik te beëindig, ’n beskermingsbevel teen haar man te bekom en ’n strafregtelike klag teen hom in te dien om haarself en hul kinders te beskerm. “Albei my kinders sukkel om te leer en is outisties. My jongste seun is nie-verbaal en die mishandeling van my man het dié gedrag baie vererger.
“Die veiligheid van my kinders is my hoogste prioriteit en daarom het ek beskerming gesoek om ons veilig te hou. My vervreemde man word deur die verskillende owerhede as ’n bekende, gerespekteerde man in die gemeenskap beskou. Gedurende hierdie tydperk het ons geen hulp van die owerhede en die Departement van Justisie ontvang nie en ek voel of ek nie ondersteun of gehoor word nie. Ek het AfriForum genader wat hul hulp aangebied het om my te help om hierdie stryd voort te sit. Ek is innig dankbaar vir hul ondersteuning en glo dat met hul hulp die waarheid aan die lig sal kom en geregtigheid sal geskied. Nie net vir my en my kinders nie, maar vir elke kwesbare persoon wat daagliks op die regstelsel staatmaak,” sê sy.
Barry Bateman, woordvoerder van AfriForum se privaatvervolgingseenheid, sê dit is nóg ’n voorbeeld van die regering wat die kwesbaarstes in die samelewing in die steek laat. “Gedurende die onlangse 16 Dae van Aktivisme het die regering en sy wetstoepassingsliggame hulle daartoe verbind om geweld teen vroue en kinders te bekamp, soos hulle elke jaar doen. Maar almal weet dat dit nie deur aksie gevolg sal word nie, en dit sal ook nie die werklikheid in polisiestasies en hofsale weerspieël nie.
“Een van die redes waarom AfriForum se privaatvervolgingseenheid gestig is, was om te verseker dat almal gelyk voor die wet behandel word. Die feite en bewyse in ’n dossier, nie ’n verdagte se sosiale of finansiële status nie, behoort die beslissende faktore te wees wanneer ’n saak oorweeg word. In hierdie geval blyk dit dat die versuim om hierdie verdagte, wat homself in die openbaar as ’n ordentlike opvoeder en sakeman voordoen, te vervolg, ’n voorbeeld van selektiewe vervolging is, en iets wat die eenheid nie sal duld nie,” sê Bateman.
Sodra die dossier in sy geheel verkry en nagegaan is, sal die privaatvervolgingseenheid besluit of hulle ’n aansoek om ’n nolle prosequi-sertifikaat sal indien.
