AfriForum stuit vir eers Nersa- en Eskom-plan wat verbruikers miljarde sou kos
AfriForum het vandag (7 Oktober 2025) die Nasionale Energiereguleerder van Suid-Afrika (Nersa) en Eskom se plan om ’n geheime skikking wat aangegaan is met ’n hofbevel te laat bekragtig, vir eers gestuit. Dié skikking wat in die Hooggeregshof in Pretoria bekragtig sou word, sou verbruikers oor die volgende drie jaar nagenoeg R54 miljard uit die sak jaag deur die implementering van ’n jaarlikse 9%-verhoging in kragtariewe. AfriForum voer aan dat dié ooreenkoms ’n reuseimpak op kragverbruikers sal hê en dat die publiek die reg het om daarin geken te word.
Met AfriForum se toetrede het Eskom ingestem om die saak van die onbestrede- na die bestrederol oor te plaas. Dié skuif skep nou vir AfriForum en ander belanghebbende partye die geleentheid om as party tot die saak toe te tree.
AfriForum meen dat die Eskom-Nersa-skikking wat agter geslote deure bereik is, onregmatig en onredelik is weens ’n gebrek aan deursigtigheid. Indien die skikking bekragtig sou word, sou kragtariefverhogings van 9% per jaar aan Eskom toegestaan word.
Kragverbruikers kan dit nie langer net duld en blindelings befonds nie.
AfriForum het reeds in September vanjaar ’n skrywe aan Eskom gerig om te versoek dat die saak van die onbestrederol verwyder moet word sodat die organisasie in die belang van sy sowat 300 000 lede en die breër publiek tot die saak kan toetree. Eskom het die versoek teengestaan en aangevoer dat AfriForum nie die reg het om in te meng nie en dat die publiek nie vetoreg het nie. Volgens Eskom het dié skikking nie openbare deelname vereis nie.
Deidré Steffens, AfriForum se raadgewer vir Plaaslikeregeringsake, bestempel die kragreus se antwoord as kortsigtig aangesien die publiek direk geraak gaan word deur hierdie ooreengekome verhoging. “Om aan te voer dat die publiek, wat die besluit moet befonds, nie ’n belang in die saak het nie, wys Eskom se blatante arrogansie. Kragverbruikers kan dit nie langer net duld en blindelings befonds nie.”
Deursigtigheid en verantwoordbare optrede word van Eskom en Nersa verwag.
Deursigtigheid en verantwoordbare optrede word van Eskom en Nersa verwag, veral in die lig van verskeie bloutjies wat reeds geloop is om kragtariewe te bereken. Daar bestaan ook steeds twyfel oor Eskom se finansiële bestuur met verskeie munisipaliteite wat miljoene aan die nutsmaatskappy skuld.
Volgens AfriForum ondermyn Nersa die vertroue van die publiek deur te poog om hierdie skikking sonder openbare deelname te sluit.
“Ons kan vandag aankondig dat AfriForum met sy sowat 300 000 lede wat sy hande sterk maak, ’n tydelike stokkie voor Nersa en Eskom se skokkende planne kon steek. AfriForum en ander belanghebbendes kan nou tot die saak toetree om toe te sien dat die publiek regverdige tariewe betaal en nie in die proses ernstig benadeel word nie,” sluit Steffens af.
