Waarnemende regter moet verduidelik waarom hy nie vir beweerde padwoedevoorval vervolg moet word

Conrad Pretorius, die slagoffer van ’n padwoedevoorval, sal hopelik in Februarie volgende jaar uitvind of die saak teen hom laat vaar gaan word en of die advokaat en waarnemende regter, Roelof du Plessis, ook sy vermeende aanvaller, eerder vervolg sal word. AfriForum se privaatvervolgingseenheid het die oorspronklike besluit betwis om nie Du Plessis te vervolg vir poging tot moord tydens ’n padwoedevoorval in 2023 nie, wat skynbaar ’n geval van selektiewe vervolging is waarin ’n regspraktisyn aanspreeklikheid vryspring weens sy status onder regslui.

Pretorius het Dinsdag in die Hatfield Landdroshof verskyn waar die saak tot 4 Februarie 2025 uitgestel is hangende die besluit of die saak teen hom voortgesit gaan word al dan nie. Die privaatvervolgingseenheid het vroeër vanjaar namens Pretorius vertoë gerig aan adv. Rodney de Kock, adjunk- nasionale direkteur van Openbare Vervolging, en aangevoer dat wanneer dit behoorlik oorweeg word, die feite daarop dui dat die aanvanklike besluit om Du Plessis nie te vervolg nie, irrasioneel was.

Die eenheid het destyds adv. De Kock se kantoor genader nadat die Gautengse direkteur van Openbare Vervolging, adv. Sibongile Mzinyathi, die vertoë summier verwerp het. Dié besluit het die eenheid se vrese bevestig dat ’n moontlike beskuldigde van ’n ernstige misdaad van vervolging beskerm word weens sy status onder regslui.

De Kock het in September gereageer en gesê hy het Du Plessis gevra om vertoë te rig waarom die aanklagte teen Pretorius nie teruggetrek moet word nie en waarom hy nie eerder vervolg moet word nie. Dié besluit word in Februarie verwag.

Die saak hou verband met ’n voorval wat op 1 Augustus 2023 plaasgevind het, waar Pretorius en sy vrou in Menlopark gery het en hulle die Du Plessis teëgekom het by ’n kruising waar die verkeersligte nie gewerk het nie. Daar word beweer dat ’n woordewisseling ontstaan ​​het wat daartoe gelei het dat Du Plessis vir Pretorius sowat vyf kilometer deur die strate van die woonbuurt gejaag het voordat hy hom na bewering in ’n doodloopstraat vasgekeer het. Daar word verder beweer dat Pretorius en Du Plessis uit hul voertuie geklim het en ’n konfrontasie ontstaan het. Pretorius voer aan dat Du Plessis hom met ’n skerp voorwerp in die nek gesteek het, waarna ’n struweling ontstaan ​​het en hy ook in die been gesteek is. Pretorius het toe daarin geslaag om in sy motor te klim en na die naaste hospitaal te ry vir behandeling.

Pretorius is gehospitaliseer en byna ’n week later ontslaan. Terwyl hy in die hospitaal was, het hy ’n saak van poging tot moord teen Du Plessis aanhangig gemaak, maar hy het gou ontdek dat die advokaat ook ’n saak teen hom aanhangig gemaak het.