Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Van verf tot verfraaiing: Só bou AfriForum-tak aan ’n beter Christiana

*Surette Goosen, skoolhoof van Wielie Walie-kleuterskool, en Bianca van der Westhuizen, voorsitter van AfriForum se Christiana-tak.*

AfriForum se Christiana-tak het in Julie weer behoorlik skouer aan die wiel gesit om deur sy uiteenlopende gemeenskapsprojekte te bou aan ’n veiliger en skoner Christiana. ’n Verfraaiingsprojek, die herstel van gevaarlike slote en die skenking van verf aan kleuterskole en broodnodige kos aan ’n plaaslike diereskuling was alles die afgelope maand op dié tak se lys van gemeenskapsprojekte – projekte wat getuig van die tak se volgehoue verbintenis tot gemeenskapsontwikkeling.

As deel van die tak se ondersteuning van plaaslike opvoedkundige instellings is meer as 40 liter verf aan die Klein Robijn-kindertuin en Wielie Walie-kleuterskool geskenk. Die verf sal gebruik word vir opknappingswerk om ’n netjiese en aangename leeromgewing vir kinders te skep.

Die tak het ook meer as 50 kg honde- en katkos aan ’n plaaslike diereskuiling geskenk om die skuiling by te staan met die versorging van diere en om die druk wat die skuiling tans ervaar, te help verlig.

*Christiana se AfriForum Jeug-tak het in Julie ’n verfraaiingsprojek in die dorp aangepak.*

Christiana se AfriForum Jeug-tak het op hul beurt ’n verfraaiingsprojek aangepak waartydens meer as 20 blompotte en asblikke in die dorp geverf is. Die projek het nuwe lewe in die dorp se straatmeubels geblaas en dra by tot ’n netjieser en aantrekliker omgewing.

Padveiligheid het ook aandag geniet toe die tak met ’n trekker-graaflaaier oop slote in Wes-, President- en Forsmanstraat toegeskraap het. Die slote het ’n ernstige veiligheidsrisiko vir padgebruikers en voetgangers ingehou, en die herstelwerk maak hierdie dele van die dorp nou weer veilig vir die gemeenskap.

*Een van die slote nadat dit toegeskraap is.*

Bianca van der Westhuizen, takvoorsitter van AfriForum se Christiana-tak, meen dié projekte maak ’n tasbare verskil in dié dorp. “Ons is trots daarop om met ons praktiese projekte ’n verskil in Christiana maak. Elke projek wat ons aanpak, dra by tot ’n veiliger, netjieser en sterker gemeenskap. Ons is dankbaar teenoor elke vrywilliger en ondersteuner wat hul tyd en hulpbronne beskikbaar stel om hierdie projekte moontlik te maak,” verduidelik sy.

Raak betrokke

Raak vandag nog betrokke by AfriForum se Christiana-tak en werk saam aan die ontwikkeling en verbetering van Christiana. Hou die tak se Facebook-blad dop vir toekomstige projekte.