Bejaarde het ná maande uiteindelik weer warm water nadat AfriForum ingryp

Danksy AfriForum se ingryping het ’n 82-jarige ná ses maande uiteindelik weer toegang tot warm water in haar eenheid in die Stillerus-aftreeoord in Bloemfontein. Haar – én haar familie – se maandelange pleidooie om die foutiewe geiser te laat herstel, het op dowe ore geval. In die tussentyd moes die bejaarde noodgedwonge sonder warm water klaarkom.

Kort nadat AfriForum van die situasie in kennis gestel is, het die organisasie die Mangaung Metropolitaanse Munisipaliteit op 19 Augustus in ’n skrywe versoek om die geiser te herstel. In die skrywe het AfriForum aangedui dat – indien daar nie opgetree word nie – klagtes teen die Mangaung-metro ingedien sal word. Verder het die organisasie ook ’n aksieplan van die metro geëis, wat aandui hoe die agterstand rakende instandhouding by die Stillerus-afreeoord  aangepak gaan word.

Die familie van die bejaarde vrou het AfriForum die volgende dag  (20 Augustus) laat weet dat ’n nuwe geiser in haar eenheid geïnstalleer is. Verder het die Mangaung-metro op 26 Augustus formeel op AfriForum se brief gereageer, waarin bevestig is dat die klagte oor die geiser aangemeld is en dat ’n aksieplan vir herstelwerk aan die Stillerus-aftreeoord verstrek is. Die organisasie sal voortgaan om die situasie te moniteer om te verseker dat die nodige instandhouding gedoen word en dat die gemeenskap se regte beskerm word.

“Ons gemeenskap kan nie ly weens ’n gebrek aan dienslewering nie, veral nie in ’n geval waar ’n pensioenaris staatmaak op hierdie fasiliteite nie. Die volhoubare instandhouding en monitering deur die metro is noodsaaklik. Hulle moet hul pligte nakom sonder om die gemeenskap in die tehuis negatief te beïnvloed,” sê Christo Groenewald, AfriForum se distrikskoördineerder in Bloemfontein.

AfriForum sal voortgaan om hierdie saak op te volg en verseker dat die nodige aksies geneem word om die probleme te herstel en verdere ongemak vir inwoners aan die aftreeoord te voorkom.