AfriForum-takke en -buurtwagte blus verskeie brande in Oos-Rand

Die AfriForum-takke in Alberton, Germiston, Edenvale en Springs het die afgelope week saam met plaaslike brandweer- en sekuriteitsdienste gewerk om verskeie brande in die Oos-Rand te blus. Danksy goeie samewerking tussen hierdie rolspelers kon grootskaalse skade en tragedies voorkom word.

Op Dinsdag, 26 Augustus, omstreeks 13:00 is ’n brand by die Golden City-skietbaan in Alberton aangemeld. Die brand het ontstaan naby opgestapelde buitebande, maar AfriForum se Alberton-tak kon dit vinnig onder beheer kry. Daar is minimale skade aan die perseel aangerig. Die oorsaak van die brand is nog onbekend. Fox Sekurteit, die plaaslike GPF en Johannesburgse nooddienste en brandweer het hier saam met die Alberton-tak gewerk.

AfriForum se Germiston-buurtwag het Dinsdagaand ook spoedig reageer toe ’n veldbrand in Cruywagenstraat in Elsburg ontstaan het. ’n Groot boom langs ’n erf het vlamgevat en daar was ’n risiko dat hierdie brand na ’n huis kon versprei. Twee buurtwaglede het die brand geblus, terwyl die res van die span die omliggende area beveilig het. Die buurtwag was besig om patrollie te ry in Tedstoneville toe die brand gerapporteer is. Legendary Guardians Security het die Germiston-buurtwag gehelp met hierdie brand.

“Ek is bitter trots op hoe vinnig ons buurtwag gereageer het en dat die span byna onmiddellik daar kon wees om te verhoed dat die brand tot by die huis versprei. Daar word ongelukkig toenemend brande in hierdie area gestig sonder dat die skuldiges aan die gevolge daarvan dink,” sê Elzabé Pretorius, voorsitter van AfriForum se Germiston-tak.

Volgens Nadia Olckers, AfriForum se distrikskoördineerder vir die Oos-Rand, het AfriForum se Germiston-buurtwag in Augustus ook veldbrandopleiding ontvang. “Ons kon nie ’n beter tyd gekies het om die opleiding aan te bied nie, dit het duidelik vrugte afgewerp tydens hierdie voorval.”

AfriForum se Edenvale- en Alberton-buurtwagte het ook op 2 Augustus veldbrandopleiding ontvang.

AfriForum se Edenvale-tak het op Sondag, 24 Augustus, gehelp om ’n brand wat by die Sheraton-kompleks ontstaan het, te blus. Die brand het omstreeks 04:53 uitgebreek in die solder van een van die woonstelle. ’n AfriForum-buurtwaglid, wat oorkant die kompleks woon, was eerste op die toneel en het onmiddellik opgetree om inwoners na veiligheid te bring. Ten spyte van swaar rook, het hy sy bes gedoen om die brand met ’n tuinslang onder bedwang te bring waarna hy twee brandblussers ingespan het om die vlamme te blus. Die brandweer het om 05:12 opgedaag om die brand finaal te blus.

Mediese dienste is ontbied vir een van die inwoners wat rook ingeasem het. Die bestuur van die Sheraton-kompleks het hul dankbaarheid in ’n skrywe aan AfriForum se Edenvale-tak uitgespreek.

AfriForum se Springs-buurtwag het op Vrydag, 22 Augustus, gehelp om ’n veldbrand in die Strubenvale-omgewing onder beheer te bring. Die brand is omstreeks 14:50 aangemeld en die vuur het vinnig in die rigting van die vleilande naby Ermelo-weg versprei en eiendom in gevaar gestel. Die AfriForum-buurtwag het saam met die Springs-brandweerdienste en die plaaslike GPF gewerk om die brand onder beheer te bring terwyl die paaie weens die digte rook gesluit is. Daar was geen beserings nie. Die oorsaak van die brand word nog ondersoek.

Volgens Petro Kirton, voorsitter van AfriForum se Springs-tak, is samewerking tussen verskillende veiligheidsrolspelers en die gemeenskap nodig in gevalle soos hierdie.