AfriForum eis dringende aanspreeklikheid van Gamagara-munisipaliteit oor nienakoming van Eskom-skuldverligtingsprogram
AfriForum doen ’n beroep op die Gamagara Plaaslike Munisipaliteit om dringend aandag te gee aan sy volgehoue nienakoming van Eskom se skuldverligtingsprogram. Dit het onder AfriForum se aandag gekom dat die munisipaliteit, ondanks sy aansluiting by die program in Desember 2023, voortdurend versuim het om sy verpligtinge na te kom.
In ’n brief wat op 10 Maart aan Lebogang Seetile, die munisipale bestuurder, gestuur is, het AfriForum ’n aantal sleutelpunte uitgelig, waaronder die Gamagara-munisipaliteit se uitstaande skuld van R650 miljoen aan Eskom. Sedert die Gamagara-munisipaliteit se aansluiting by die Eskom-skuldverligtingsprogram, is herhaalde nienakoming-sertifikate aan die munisipaliteit uitgereik, terwyl onderbetalings op Eskom se lopende rekening sedert Junie 2024 opgemerk is.
Die munisipaliteit het tot 16 Maart om die kwessie oor sy uitstaande skuld met Eskom uit te klaar, anders loop die munisipaliteit die risiko om ’n R387 miljoen-skuldverligtingsvoordeel te verbeur en bykomende aanspreeklikhede van R111 miljoen plus rente aan te gaan. Dit kan katastrofiese gevolge hê op dienslewering, insluitend potensiële beurtkrag wat kwesbare inwoners en plaaslike ondernemings verder sal raak.
AfriForum is verder bekommerd oor die gebrek aan dissiplinêre maatreëls met betrekking tot die munisipaliteit se finansiële hoof. Hierdie kwessie het reeds die aandag van wetgewende belanghebbendes getrek, wat die dringende behoefte aan deursigtige en doeltreffende finansiële bestuur beklemtoon.
AfriForum het ’n gedetailleerde verduideliking van die Gamagara-munisipaliteit aangevra oor die beplande maatreëls om hierdie kritieke kwessies reg te stel. Indien die munisipaliteit versuim om ’n bevredigende verduideliking teen Woensdag 12 Maart om 14:00 te stuur, sal AfriForum verdere stappe oorweeg.
