Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum bevraagteken grondwetlikheid van NERSA se geheime Eskom-skikking

AfriForum bevraagteken die grondwetlikheid van die Nasionale Energiereguleerder van Suid-Afrika (NERSA) wat in die geheim tariefgeskille met Eskom agter geslote deure skik. Volgens die burgerregteorganisasie is dit moontlik dat hierdie praktyk die beginsels van deursigtigheid, verantwoordbaarheid en die beskerming van verbruikers, ondermyn – iets wat NERSA grondwetlik verplig is om te handhaaf.

In sy verklaring van 27 Augustus het NERSA erken dat daar foute in sy sesde veeljarige tariefbepalingaansoek (MYPD6) was en bevestig dat Eskom ’n bykomende R54 miljard oor drie jaar sal ontvang. Dit sal elektrisiteitspryse vir die 2026/2027 en 2027/2028 finansiële jare tot byna 9% per jaar laat styg, verdere aanpassings uitgesluit.

NERSA het oor hierdie skikking geswyg totdat die media die saak blootgelê het. AfriForum is van mening dat die weerhouding van hierdie kritieke inligting van die publiek, wat uiteindelik die koste sal dra, ’n ernstige vertrouensbreuk en growwe nalatigheid deur die reguleerder verteenwoordig.

“NERSA het self erken dat foute ter waarde van miljarde rand in sy tariefbepalingaansoek gevind is. Deur ’n geheime skikking met Eskom te sluit in plaas daarvan om die saak aan volle deursigtigheid en openbare deelname te onderwerp, wys op die moontlike ongrondwetlike en onregmatige wyse waarop NERSA opgetree het. Verbruikers moet nie die las van die reguleerder se foute dra nie,” sê Morné Mostert, bestuurder van Plaaslikeregeringsake by AfriForum.

AfriForum benadruk dat NERSA grondwetlik en statutêr verplig word om in die openbare belang op te tree. Artikel 195 van die Grondwet vereis deursigtigheid en verantwoordbaarheid in openbare administrasie, terwyl die Wet op die Bevordering van Administratiewe Geregtigheid reguleerders verplig om redes te verskaf vir besluite wat burgers se regte wesenlik raak.

AfriForum sal vervolgens met sy regspan konsulteer rakende die grondwetlikheid van NERSA se geheime skikking en verdere stappe oorweeg.

“Besluite oor kragtariewe moet wettig, billik en deursigtig wees. AfriForum sal sy regspan raadpleeg oor die grondwetlikheid van NERSA se besluit om in die geheim te skik en op verdere stappe besluit om sodoende die belange van burgers te beskerm,” voeg Mostert by.