Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

Beleef Lief(de) saam met Jacob Swann

Jacob Swann, die sanger en liedjieskrywer wat in 2023 met ’n Aitsa-toekenning vereer is vir sy nou reeds ikoniese liedjie “Lief”, kom 9 Oktober op die planke by die AfriForum Teater. Kom beleef ’n aand van liefde met Swann se uitsonderlike Lief-vertoning ten bate van die StartWell-stigting, ’n nasionale liefdadigheidsorganisasie wat daagliks etes aan meer as 13 000 kinders voorsien.

Swann het reeds die afgelope paar jaar met sy unieke klank en styl ’n plek vir homself uitgekerf in die plaaslike musieklandskap. Treffers soos “Lief” en “Two blue eyes” verweef elemente van klassieke country, alternatiewe rock en die Americana-genre. Dié samevloeiing van genres vorm ’n unieke genre wat Swann as outentieke Afrika-Americana bestempel. Dié Wes-Kaapse sanger het reeds twee Aitsa-toekennings én ’n SAMA-nominasie agter sy naam en sy musiek bevestig dat hy veel meer as net ’n kunstenaar is – hy is ’n storieverteller.

Sy musiek spreek tot alle ouderdomme, sy lirieke is opreg en sy melodieë bly jou by. Boonop bied Lief meer as net vermaak. Dit is ’n professionele musiekproduksie deur die stem wat jou hart herken. Kortom, Lief is ’n belewenis.

Meer oor die StartWell-stigting

Swann se Lief-produksie word ten bate van die StartWell-stigting aangebied. Dié organisasie fokus op die bekamping van wanvoeding en groeivertragings onder kinders en werk reeds sedert 2018 aan die ontwikkeling, maak en verskaffing van voedsame, klaargaar maaltye vir kinders wat aan chroniese wanvoeding blootgestel word. Hul pasgemaakte maaltye voldoen aan streng gesondheidsmaatreëls, is gemaak van hoë gehalte bestanddele en bied die ideale voeding vir optimale liggaamsgroei en breinontwikkeling. StartWell fokus egter nie net op voeding nie, maar ook op opvoeding en bemagtig ouers met kennis vir die gesonde ontwikkeling en groei van babas en kleuters.

Kaartjies vir Lief, met Jacob Swann, ten bate van die Startwell-stigting is nou beskikbaar! Besoek www.afriforumteater.co.za vir meer inligting en om kaartjies te koop. Moet nie dié vertoning misloop nie.

Datum: Donderdag 9 Oktober 2025

Tyd: 19:00

Plek: AfriForum Teater, Greenlyn Village-sentrum, h.v. Thomas Edison- en 13de Straat, Menlopark, Pretoria

Kaartjies: R200 per persoon