Hulisani ifa ḽa mirafho yo fhiraho nga kha mushumo wo ḓikumedzelaho, u re na milayo nga Ḓuvha ḽa Afrika
AfriForum i ita khuwelelo kha zwitshavha zwa mvelele na madzangano a tshitshavha u hulisa ifa ḽa mirafho yo fhiraho nga kha mushumo wo ḓikumedzelaho wo livhiswaho kha u tsireledza vhumatshelo havhuḓi ha vhana vha Afrika na u sedza nga huswa kha u khwaṱhisa vhuḓiṱaluli ha mvelele, mbofholowo na vhulamukanyi. AfriForum yo ita khuwelelo iyi nga tshifhinga tsha u pembelela Ḓuvha ḽa Afrika nga ḽa 25 Shundunthule.
AfriForum i shuma nga u ḓikumedzela u tsireledza vhumatshelo ho vhofholowaho, ho tsireledzeaho na vhu bvelelaho ha Mavhuru, kha u tshila nga mulalo na zwiṅwe zwitshavha zwa mvelele, kha ṱhodzi ya tshipembe ha Afrika. U swikelela zwenezwi, AfriForum i fhaṱa vhushaka havhuḓi na tshumisano, yo ḓisendeka kha u ḓivhana na ṱhonifho, na zwiṅwe zwitshavha zwa mvelele, na u ita thandela dzo ṱanganelaho dzine dza thoma kha tshitshavha dzine dza khwaṱhisa vhuḓiṱaluli ha mvelele khathihi na u ḓitika ha tshitshavha na u ḓiṱhogomela. “Ri nga si kone u shandula tshifhinga tshashu tsho fhiraho tshi konḓaho, naho ri tshi nga takalela u ita nga u ralo. Naho zwo ralo, vhumatshelo vhu zwanḓani zwashu – ndi zwine ra khou sedza khazwo; ri khetha uri vhulamukanyi vhu bvele phanḓa,” hu amba Vho-Barend Uys, Ṱhoho ya Vhushaka ha Mvelele dzo Fhambanaho na Tshumisano kha AfriForum.
“Afrika ḽo beba Muvhuru; a ri na huṅwe haya. Ngauralo ndi ndugelo kha riṋe u shumisana nga u ḓikumedzela u itela u tsireledza vhumatshelo ha vhana vhashu na vhana vha zwiṅwe zwitshavha zwa mvelele. Afrika na vhathu vhaḽo vha na vhukoni vhuhulwane nahone ri tenda uri vhukoni ha dzhango ḽashu ḽo nakaho vhu nga vulwa nga ho fhelelaho nga zwitshavha zwine zwa hwala vhuḓifhinduleli, u vhuyedzedza na u vhulunga tshifanyiso tsha mvelele tshi re na mutakalo na u ḓifulufhela, u khwaṱhisa u ḓitika ha tshitshavha na u shumisana na zwiṅwe zwitshavha hune zwa konadzea. Ṋamusi ri dovha ra elelwa mirafho yo fhiraho ye ya ḓidzima zwithu zwinzhi u itela u khwaṱhisedza uri roṱhe ri vhe na vhudzulo fhano,” hu phetha Uys.
Tshivenda
