AfriForum dien Opod-klag in teen polisiekonstabel ná beweerde pligsversuim in Oudtshoorn-voorval
AfriForum het vandag ’n klag by die Onafhanklike Polisieondersoekdirektoraat (Opod) ingedien teen ’n konstabel van die Suid-Afrikaanse Polisiediens (SAPD) verbonde aan die Oudtshoorn-polisiestasie. Die klag volg in reaksie op die polisielid se beweerde pligsversuim tydens ’n openbare oproerigheid wat die afgelope Vrydag (13 Februarie) in Oudtshoorn losgebars het.
Tydens die voorval het ’n groep gewelddadige tieners na bewering slaags geraak met lede van die publiek. Die tieners was na bewering gewapen met messe. Dit blyk dat die plaaslike polisie bewus was van die ontvouende gebeure, maar ondanks die erns daarvan stadig was om te reageer.
AfriForum se Opod-klag het egter spesifiek betrekking op die gedrag van ’n konstabel wat na bewering ten tyde van die voorval verby die toneel gery het sonder om in te gryp.
Volgens Jacques Broodryk, hoofwoordvoerder vir Gemeenskapsveiligheid by AfriForum, het die einste konstabel na bewering nie gestop om die situasie te assesseer nie. Hy het ook nie homself as polisiebeampte geïdentifiseer of polisiebystand versoek nie, maar eerder ’n video van die voorval geneem en dit op sosiale media gedeel – ’n stap wat die spanning op die dorp selfs verder laat eskaleer het.
AfriForum versoek Opod nou om ondersoek in te stel na die polisielid se gedrag om te bepaal of dit neerkom op pligsversuim.
“Polisielede het ’n wetlike en etiese verantwoordelikheid om in so ’n situasie na te kom. Wanneer ’n onstabiele situasie ontvou, verwag die publiek besliste optrede en nie blote passiewe waarneming nie,” verduidelik Broodryk. “Indien bevind word dat die bewerings waar is, kom die gedrag neer op ’n ernstige skending van openbare vertroue in die SAPD. Dit kan nie toegelaat word dat diegene wat belas is met die handhawing van wet en orde, hul plig blatant versuim nie.”
AfriForum beklemtoon dat hierdie klag nie ’n aanval op die SAPD as ’n instelling is nie, maar eerder ’n oproep tot verantwoording. Die organisasie hou vol dat professionele polisiëring wat reageer wanneer die nood dit vereis, noodsaaklik is. Dit sal onnodige eskalasie van oproerigheid voorkom en vertroue inboesem in wetstoepassing.
Die burgerregteorganisasie sal die Opod-ondersoek noukeurig monitor en doen ’n ernstige beroep op die hantering daarvan op ’n deursigtige en onpartydige wyse.
