AfriForum se Oos-Rand-takke spring in om vier brande te blus
Binne die eerste maand sedert 41 AfriForum-lede van die organisasie se takke aan die Oos-Rand veldbrandopleiding ontvang het, het hulle reeds bystand verleen by vier brande wat in dié gebied gewoed het. Hulle was onder meer betrokke by die blus van veldbrande in Springs (op 22 Augustus) en Germiston (25 Augustus), ’n huisbrand in Edenvale (24 Augustus) en ’n brand by die Golden City-skietbaan in Alberton (26 Augustus).
Dirkie Burger en Gerhard Goosen van AfriForum se Germiston-tak het op 25 Augustus gehelp om ’n veldbrand, waar ’n groot boom direk langs ’n huis aan die brand geslaan het, te blus.
“Ons span het vinnig opgetree ná ons die situasie in die veilige area bespreek het. Die brandspan het dadelik gefokus op die blus van die boom en om die veiligheid van die inwoners te verseker, terwyl die res van ons span grondwerk verrig het,” vertel Goosen.
Volgens Burger was dit die opleiding wat hulle op 2 Augustus ontvang het wat hulle in staat gestel het om vinnig en doeltreffend op te tree. “Tydens die voorval kon ek die veilige area akkuraat identifiseer en doeltreffend grondwerk verrig, terwyl ons brandspan besig was om die boom te blus. Hierdie boom het ’n ernstige risiko ingehou aangesien dit op ’n inwoner se huis kon val. Tydens ons veldbrandopleiding het ek waardevolle lesse geleer, soos om eers die impak van ’n brand te bepaal en dan te beplan vir verskeie moontlike situasies,” sê hy.
In Edenvale het AfriForum se plaaslike tak ook ’n reusebydrae gemaak om ’n brand by ’n woonstel te help blus. Peter Kaminski, hoof van Omgewingsake by AfriForum se Edenvale-tak, sê die brand het Sondag 24 Augustus in die vroeë oggendure uitgebreek en alhoewel die woning ernstige skade opgedoen het, kon AfriForum se flink optrede verseker dat die inwoners die eenheid veilig ontruim.
“Die brand het omstreeks 04:00 die oggend in die woonstel uitgebreek. Die eienaar het hulp ontbied en gelukkig woon ’n AfriForum-buurtwaglid net oorkant vanwaar die brand uitgebreek het. Hy was gou op die toneel en het die inwoners dadelik ontruim. Die brand is met brandblussers en ’n tuinslang onder beheer gebring. Die brandweer het eers ná 05:00 opgedaag waarna die brand finaal geblus is,” sê Kaminski.
Beverley Schmidt, skakelbeampte by die Sheraton-kompleks waar dié brand plaasgevind het, het na afloop van die brand in ’n brief Kaminski en die AfriForum-span vir hul hulp bedank. “Julle het met die hulp van ons sekuriteitsbeampte beheer van ’n gevaarlike situasie geneem. Ek bedank julle vir jul volharding en hulpvaardigheid. Ek is baie dankbaar,” sê sy in die brief.
Die brandbestrydingskursus wat AfriForum-lede aan die Oos-Rand toegerus het met kennis en vaardighede wat nou reeds so ’n groot bydrae in dié gebied gemaak het, is op 2 Augustus in Benoni aangebied. Lede van AfriForum se Germiston-, Alberton-, Edenvale- en Brakpan-takke het die kursus bygewoon waar hulle teoretiese en praktiese opleiding ontvang het.
Aangesien veldbrande die gebied hierdie tyd van die jaar teister, het AfriForum besluit om dié spesifieke opleiding aan takke aan te bied. Daar is in besonder gefokus op eie veiligheid en situasiebewustheid, relevante wetgewing, samewerking met ander rolspelers, beginsels van bevel en beheer, operasionele koördinering en doeltreffende kommunikasie tydens noodgevalle.
“Ons spanne kon vinnig reageer en doeltreffend optree en dit is te danke aan die opleiding wat hulle gekry. Munisipaliteite se brandbestrydingsdienste is geweldig uitgedun en kan nie meer by alles uitkom nie. In sommige gevalle is hul reaksietyd ook nie na wense nie en dit maak dit noodsaaklik vir AfriForum om lede op te lei om ook brandbestrydingsdienste te lewer,” verduidelik Nadia Olckers, AfriForum se distrikskoördineerder vir die Oos-Rand.
