AfriForum and March and March vha vhumba tshumisano u itela u vhuyedza zwitshavha
Dzangano ḽa pfanelo dza vhadzulapo ḽa AfriForum na dzangano ḽa March and March vho amba vho sedza kha u vhuyedza zwitshavha na vhadzulapo nga tshifhinga tsha musi vha dzangano ḽa March and March vha tshi dalela AfriForum nga ḽa 18 Ṱhangule 2026. Nga tshifhinga tsha muṱangano ho haseledzwa khaedu na madzangalelo o khetheaho na o ṱanganelanaho, khathihi na thandululo dzine dza nga vha hone na tshumisano. Vhurumelwa ha March and March ho vha ho rangwa phanḓa nga mutumbuli waho, Vho-Jacinta Ngobese-Zuma, vhe vha ṱanganedzwa nga CEO wa AfriForum Vho-Kallie Kriel na vhurumelwa ha ḽeneḽi dzangano ḽa pfanelo dza vhathu.
Dzangano ḽa zwitshavha, mbekanyamushumo dza zwitshavha dzo itelwaho u khwinisa nyimele dzavho dza matshilisano na ikonomi nga ngomu ha muhanga wa mulayo, u ṱuṱuwedza pfunzo ya luambo lwa ḓamuni na pfunzo i shumaho, i swikeleleaho, khathihi na u isa phanḓa u tshilisana nga mulalo, zwo topolwa sa masia ane ha nga vha na tshumisano. Zwiṅwe hafhu, eneo madzangano o tendelana uri a ḓo ṱanganelana kha u tevhela mafhungo a mulayo ane vhoṱhe vha vha na dzangalelo khao na u tikedzana kha mafhungo a tshimbidzanaho na u tevhela mulayo na u lwa na vhugevhenga zwitshavhani, hu tshi katelwa na u pfulutshela vhathu kha maṅwe mashango zwi siho mulayoni.
U ya nga Vho-Ngobese-Zuma, ndi zwa ndeme vhukuma u sika Afrika Tshipembe ḽi re na vhuthihi ḽo ḓisendekaho kha zwilinganyo zwa ubuntu, u ṱhonifha mvelele na lutendo lwa vhurereli ha zwitshavha na u tevhela mulayo nahone zwilinganyo zwa mutheo zwa March and March ndi pfanelo dza vhathu dza shango ḽoṱhe u itela vhadzulapo vhoṱhe vha Afrika Tshipembe, hune pfunzo ya vha mutheo wa u bvelela ha lushaka. Ḽeneḽi Dzangano ḽi tenda uri hu tea u thewa maitele ane a khwaṱhisedza uri zwitshavha zwi a shumisana u itela uri muvhuso u hwale vhuḓifhinduleli na u khwaṱhisedza uri vhathu vhoṱhe vha tevhela mulayo.
“Dzangano ḽi tenda uri mikano i songo tsireledzwaho i na masiandoitwa mahulwane kha ikonomi ine ya khou thenga-thenga. Nyengedzo khulwane ya u rengiswa ha thundu dzi siho mulayoni zwi khou kwama mabindu nahone zwi nga ita uri vhathu vha xelelwe nga mishumo. Vhugevhenga vhu khou bvela phanḓa na u tshinyadza zwitshavha, nahone madzangano a vhadzulapo a tea u shumisana uri hu vhe na maitele ane a ḓo khwaṱhisedza uri zwitshavha zwo tsireledzea. Ḽeneḽo dzangano ḽi tenda uri vhuaḓa na u shaya vhutsila ha vhaṅwe, khamusi vhanzhi, kha muvhuso zwi ṱoḓa ṱhogomelo yo ṱavhanyiswaho na tshumisano nga madzangano o fhamba-fhambanaho o thewaho kha tshitshavha, a sa ṱuṱuwedzwi nga madzangalelo a zwa polotiki, uri a fhelise vhutshinyi.”
“Dzangano ḽi tenda uri vhushaka havhuḓi vhukati ha enea madzangano mavhili vhu a zwi ṱhogomela uri naho vhe na madzangalelo a fanaho, vha dovha vha vha na zwithu zwinzhi zwine vha sa ḓo tendelana khazwo. Vhushaka havho ho thewa kha u ṱhonifhana, enea madzangano a tendelana uri a ḓo thusana na u itelana khaedu musi vha sa tendelani, tshipikwa hu u swikelela Afurika Tshipembe ḽi re na vhuthihi ḽine ḽa ṱhonifha na u dzhiela nṱha u fhambana,” vha ralo Vho-Ngobese-Zuma.
Vho-Kriel vha ombedzela uri AfriForum ḽo no ḓi thoma u shumisana na madzangano manzhi na zwitshavha zwine zwa ḓiimisela u fhaṱa vhumatshelo ha khwine ha vhathu vha shango. “Muthu a nga khetha u shumisana hune ra tendelana hone na hune ra vha na madzangalelo a fanaho. Ri songo tendela u sa pfana kha maṅwe mafhungo zwi tshi thithisa tshumisano ine ya ḓo vhuyedza vhana vhashu. Hu na zwifhinga zwine zwa vha zwo tea u gwalabela u kundelwa ha muvhuso, fhedzi ndi zwa ndeme vhukuma u shumisa zwanḓa zwashu u fhaṱa vhumatshelo vhune ra vhu ṱoḓa. AfriForum yo ḓiimisela u kovhelana, nga u ḓiṱukufhadza na nga nḓila yo vuleaho, zwe zwa ri shumela na zwi songo ri shumelaho miṅwahani ya 20 yo fhiraho sa izwi ro fhaṱa heḽi dzangano u bva fhasi u swika kha miraḓo ya 300 000. Ro lavhelela u shumisana na March na March kha vhuḓidini havho ha u sima dzangano ḽo livhiswaho kha tshitshavha ḽine ḽa nga khwinisa vhutshilo ha vhathu zwavho kha zwitshavha zwapo,” vha ralo Vho-Kriel.
Nga tshifhinga tsha muṱangano, khaedu nnzhi dzi bveledzwaho nga u kundelwa ha muvhuso dzo haseledzwa, u katela na u wa ha vhulanguli ha mikano na u kundelwa u thivhela vhugevhenga, zwine zwa sia zwitshavha zwi fhasi ha tshutshumedzo ya vhugevhenga tshifhinga tshoṱhe. U kundelwa ha maitele a pfunzo ya tshitshavha na zwone zwo vha iṅwe ṱhoho ya ndeme ye ya haseledzwa.
Ho dovha ha haseledzwa nga zwiṅwe zwipiringululi zwine zwitshavha zwa nga zwi bveledza na u zwi shumisa, khathihi na zwikhala zwa tshumisano. Zwenezwi zwo katela u dzudzanya zwitshavha na u ṱalula maga a re mulayoni a u khwinisa tsireledzo ya zwitshavha. Mveledziso ya vhulimi, u vhulunga vhuṋe na vhufa, pfunzo, vhugudisi na mveledziso ya vhutsila na zwone zwo haseledzwa sa masia ane zwitshavha zwa nga shela mulenzhe nga nḓila i fhaṱaho.
U ya nga Vho-Barend Uys, Ṱhoho ya Vhushaka ha Tshumisano na Mvelele kha AfrioFrum, AfriForum i fhaṱa vhushaka havhuḓi nahone i shumisana na madzangano na zwitshavha zwa mvelele zwo thewa kha u ḓivhana na u ṱhonifhana. “Ri ita hoyu mushumo ngauri ri tenda uri ndi wa ndeme u khwaṱhisedza uri zwitshavha zwoṱhe zwi tshilisana zwavhuḓi nga mulalo shangoni. Mushumo washu wo livhiswa kha zwitshavha zwapo nahone a ri pfesesa thaidzo dzine vhathu zwavho, khathihi na vharangaphanḓa vha mvelele na zwitshavha, vha sedzana nadzo. Tshitshavha tshiṅwe na tshiṅwe, dzangano na vharangahanḓa vhane vha khetha u hwala vhuḓifhinduleli ha vhumatshelo havho na u shela mulenzhe kha u fhaṱa vhumatshelo ha khwine ha vhana vhashu, ho ḓisendekaho kha mikhwa ya mvelele yo khwaṱhaho u fana na miṱa i re na mutakalo wavhuḓi, vhuḓifhinduleli, u pfela vhuṱungu na ṱhonifho na bono ḽi fanaho, ndi khonani dza ndeme kha riṋe. Ndi ngazwo AfriForum yo no saina thendelano dza tshumisano na madzangano nahone i tshi khou shuma na ane maṅwe ao a vha a tevhelaho AmaBhele KaJamangile, Barolong Boo Seleka, Batlharo Boo Tokwana Ba Ga Masibi, Batlokoa Ba Mota, Batlharo Ba Ga Motlhware, Vulamehlo Kusile Organisation na the Royal Leaders of South Africa (ROLESA),” hu ṱalutshedza Vho-Uys.
“Mbekanyamaitele dza muvhuso dzi si dzavhuḓi na mihumbulo yo fhelelwaho nga tshifhinga ndi zwone zwine zwa vha mudzi wa khaedu nnzhi dzo livhanaho na zwitshavha u mona na dzingu ḽa SADC. Muvhuso wo rangwaho phanḓa nga ANC u sokou ṱanzwa maṱo wa lavhelesa nṱhani ha u ṱuṱuwedza mashango a dzingu uri a shumise mbekanyamaitele dzine dza ḓo khwinisa nyimele mashangoni avho na u thivhela u dzhena ha vhathu Afrika Tshipembe zwi siho mulayoni. Zwi re zwone ndi uri kha maṅwe masia ANC i tevhela mbekanyamaitele dzi tshinyadzaho dzi fanaho, dzine dza shela mulenzhe kha thaidzo dzine ra sedzana nadzo fhano hayani. Zwi khagala uri ANC na muvhuso une ya khou ranga phanḓa, a vha vhei madzangalelo a vhadzulapo phanḓa, fhedzi vha vhea madzangalelo avho na a vhatikedzi vhavho vha kale vha zwa polotiki na mihumbulo. Vhane vha ṱoḓa u vhona vhumatshelo havhuḓi ha tshipembe ha Afurika vha ḓo tea u ita uri mivhuso i hwale vhuḓifhinduleli ngeno vha tshi dovha vha hwala vhuḓifhinduleli ha u fhaṱa vhumatshelo honoho nga vhone vhaṋe,” vha phetha nga u ralo Vho-Kriel.
AfriForum na March and March vha khwaṱhisedza uri madzangalelo a zwitshavha na vhadzulapo a tea u tevhelwa tshifhinga tshoṱhe nga mulalo nahone nga ngomu ha muhanga wa mulayo, na uri khakhathi na u tshuwisa a zwo ngo tendelwa kha vhuḓidini uhu.
Tshivenda
