Hlompha bohwa bja meloko ya nakong e fetilego ka go šoma ka mafolofolo, ka go dumelelana le melao ya motheo Letšatšing la Afrika
AfriForum e ipiletša go ditšhaba tša setšo le mekgatlo ya setšhaba go hlompha bohwa bja meloko ya nakong e fetilego ka go šoma ka mafolofolo bakeng sa bokamoso bjo bo phadimago bakeng sa bana ba Afrika le go lebiša tlhokomelo go matlafatšeng setšo sa bona, tokologo le toka. AfriForum e dirile boipiletšo bjo nakong ya go binwa ga Letšatši la Afrika ka Mopitlo 25.
AfriForum e šoma ka boineelo go kgonthišetšeng bokamoso bjo bo lokologilego, bjo bo šireletšegilego le bjo bo atlegilego bja Ma-Aforikanere, ka go phela gotee ka khutšo le ditšhaba tše dingwe tša setlogo lenakeng la ka borwa la kontinente ya Afrika. Go fihlelela se, AfriForum e aga ditswalano tše di agago le ditšhaba tše dingwe tša setšo le tirišano yeo e theilwego go amogelaneng le go hlomphana, le go dira mediro ya mohlakanelwa le ditho tša setšhaba yeo e matlafatšago setšo sa tšona le go dira gore ditšhaba tše di kgone go iphediša le go iphepa. “Go sa šetšwe gore re leka ka thata gakaakang, re ka se kgone go fetoša nako e thata yeo re bilego le yona. Lega go le bjalo, bokamoso bja rena bo diatleng tša rena – ke seo re lebišitšego tlhokomelo ya rena go sona; re kgetha go tšwela pele re phela gotee ka khutšo le ka toka”, go bolela Barend Uys, Hlogo ya Ditswalano tša Ditšhaba tše Dintši le Tirišano go AfriForum.
Ma-Aforikanere a tšwa Afrika; ga re na legae le lengwe. Ka gona re šegofaditšwe ka go kgona go dirišana ka boineelo bakeng sa go kgonthišetša bokamoso bjo bo phadimago bakeng sa bana ba merafo e mengwe. Afrika le batho ba yona ba na le bokgoni bjo bogolo, gomme re dumela gore bokgoni bjo bo tletšego bja kontinente ya rena e botse bo ka fihlelelwa feela ke ditšhaba tše di nago le boikarabelo, tšeo di kgonago go tsošološa le go šireletša setšo sa tšona le go ba le boitshepo, ditšhaba tšeo di kgonago go matlafatša go iphediša ga tšona, tšeo di dirišanago le ba bangwe moo go kgonegago. Lehono re gopola gape meloko ya nakong e fetilego yeo e ilego ya dira boikgafo bjo bogolo go kgonthišetša gore ka moka ga rena re ba karolo ya setšhaba se,” go phetha.
Sepedi
