AfriForum i sasaladza Muhasho nga u kundelwa u fhirisela mavu kha tshitshavha tsha Dennilton

AfriForum yo ṱoḓa phindulo u bva kha Muhasho wa Mbuyedzedzo ya Mavu na Mveledziso ya Mahayani Limpopo nga ḽa 25 Ṱhangule nga murahu ha musi Muhasho wo kundelwa u ṋetshedza muvhigo wa mvelaphanḓa malugana na u fhiriselwa ha mavu kha miraḓo ya Dzangano ḽa Vhaṋe vha Mavu ḽa Dennilton. Vhukando uhu vhu tevhela maṅwalo e dzangano ḽa pfanelo dza vhadzulapo ḽa a rumela nga ha mafhungo aya nga ṅwedzi wa Lambamai na Shundunthule nga murahu ha musi Dzangano ḽa Vhaṋe vha Mavu ḽo kwama AfriForum u itela u wana thikhedzo. Khumbelo dza u thoma dza u fhiriselwa ha mavu dzo ṋetshedzwa u bva murahu nga Fulwana 2017, a hu na mvelaphanḓa yo sumbedzwaho u bva tsheetsho. Vhaṋe vha mavu vho humbela uri mavu avho a fhiriselwe khavho u ya nga Mulayo wa Nzudzanyo ya Mavu wa Vhu-111 wa 1993.

“Miraḓo ya Dzangano ḽa Vhaṋe vha Mavu ḽa Dennilton vho sedzana na khaedu khulwane ngauri a vha na maṅwalo a vhuṋe ha mavu avho. U dzheniswa ha phaiphi dza maḓi na u fhaṱiwa ha tshiṱitshi tsha maanḓa a muḓagasi wa ḓuvha zwi khou bvela phanḓa, fhedzi u shayea ha bammbiri a khwaṱhiso ya vhuṋe zwi ita uri hu kandekanywe pfanelo dza vhaṋe vha mavu. Vha dovha vha sedzana na khaedu dza u dzula zwi siho mulayoni fhethu he vha hu ḓowela nahone vha vhilaedziswa nga u fhiriselwa ha mavu kha vhathu vha si na pfanelo yo teaho khao,” vha ralo Vho-Barend Uys, Ṱhoho ya Vhushaka ha Tshumisano na Mvelele kha AfriForum.

Vhuḓifari ha Muhasho vhu takusa mbudziso khulwane nga ha u ḓikumedzela ha muvhuso wo rangwaho phanḓa nga ANC kha pfanelo dza vhuṋe ha mavu. Vho-Uys vha amba uri tshitshavha hetshi tsho no fhedza minwaha i ṱoḓaho u vha fumi tsho lindela uri mavu avho a fhiriselwe khavho. “Zwiito zwi amba nga maanḓa u fhira maipfi — zwi khagala uri vhavhusi a vha na ndavha na pfanelo ya vhadzulapo avha ya u vha na mavu avho. Hezwi zwi khwaṱhisedza mbilaelo khulwane dza AfriForum nga ha vhuḓidini ha muvhuso vhu bvelaho phanḓa ha u ṋea maanḓa vhaofisiri kha zwipiḓa zwo fhamba-fhambanaho zwa muvhuso uri vha dzhie mavu hu si na mbadelo.”

U ya nga Vho-​​Uys, u kundelwa ha vhavhusi u shumisa nga nḓila yavhuḓi mulayo une wa vha hone u itela u fhirisela mavu kha vhathu na zwitshavha ndi mukhuvha u vhilaedzisaho. “Muvhuso u khou dovha wa kundelwa u shumisa Mulayo wa u Khwinisa Pfanelo dza Vhuṋe ha Mavu wa vhu-112 wa 1991, nahone ho no itwa ndingedzo nnzhi dza u fhelisa wonoyu Mulayo. Hezwi zwi itwa naho hu na Mulayo wo tea vhukuma wa u fhirisela mavu a zwitshavha zwa mvelele khavho. Zwi khagala uri muvhuso wo rangwaho phanḓa nga ANC u khou thithisa nga khole u fhiriselwa ha mavu u itela u lingedza u langa zwitshavha nga nḓila i songo teaho,” vha ralo.

AfriForum i ṱuṱuwedza zwitshavha zwa sialala na zwiṅwe zwitshavha u thoma maitele a u fhirisela mavu u ya nga mulayo uyu, u itela u tsireledza mavu avho uri hu vhuyelwe mirafho i ḓaho.

“U vha na mavu au ndi tshithu tshihulwane kha u sika mvelaphanḓa,” vha phetha nga u ralo Vho-Uys.