AfriForum e atlehile ntweng eo e e lwaneng nako e telele lekgotleng la dinyewe kgahlano le Tonakgolo ya Freistata

AfriForum le Forum ya Kgwebo ya Mafube ( Mafube Business Forum (MBF)) di ile tsa atleha Lekgotleng le Phahameng la Dinyewe Bloemfontein ntweng eo e e lwaneng nako e telele kgahlano le Tonakgolo ya Freistata le baikarabedi ba bang ba 12. Nyewe e neng e mamentswe ke  palo e feletseng ya baahlodi e fane ka taelo e rarollang qwaketsano ya ditokelo  tsa molao tsa ba ipiletsang hore Tonakgolo ya Freistata le baikarabedi  ba bang , ho kenyeleditswe Lekgotla la Phethahatso la provense, ba hlolehile ho ho ikobela ditaelo tse ntshitsweng mohla la 28 Mmesa 2022 le mohla la 29 Phupu 2021 mme ka lebaka leo ba molato wa ho nyedisa lekgotla.

Qeto e tswalwa ke kopo ya nyediso ya lekgotla e hlahletsweng ke AfriForum mme e ile ya mamelwa ke palo e feletseng ya baahlodiya Lekgotla le Phahameng la Dinyewe la Bloemfontein  mohla la 11 Mphalane 2024.  Sepheo sa nyewe ya AfriForum le MBF e ne e le ho netefatsa phano ya ditshebeletso tse sa kgaotseng Masepaleng wa Lehae wa Mafube, o kenyeleditseng Frankfort, Tweeling, Villiers le Cornelia. Ho ya ka AfriForum, phano ya ditsebeletso Frankfort ka ho qolleha e putlame ka hohlehohle.

.Baikarabedi ba laetswe, hara dintho tse ding, ho phethahatsa le ho kenya tshebetsong lewa le tsosolosang ditjhelete ntle le tieho; le ho thibela ka potlako tshilafatso ya Dinoka tsa Lekwa (Vaal) le Namahadi (Wilge) e bakwang ke tshebetso ya dikgwerekgwere; mme ba tlalehele lekgotla tlasa kano mahareng a matsatsi a 60 mehato ya nakwana e kentsweng tshebetsong ho thibela ho tsholohela ha dikgwerekgwere.

Baahlodi J. Daffue, S. Chesiwe le S. Hefer, ba qotsa Dr Namane Masemola, Motlatsi wa Letona la Lefapha la Puso ya Kopanelo le Ditaba tsa Marena (Department of Cooperative Governance and Traditional Affairs), kathlolong e ileng a e diha, o ile a toboketsa hore batho ba Freistata ba lokela ke ho betere. Baile ba ngangisana hore bomasepala ba tlameha ho ba le boikemisetso bo botjha ba puso bo nang le boikarabelo bakeng sa phano ya ditshebeletso e sebetsang, Ho feta moo, baahlodi ba ile ba ngangisana  hore baikarabedi ba hlokomoloha ho fedisang pelo boikarabelo ba bona ho latela molao wa motheo mme ba tlola molao wa ditokelo tsa mantlha tsa badudi ba Frankfort le ditoropo tse ding tse Masepaleng wa Mafube.

  Ho ya ka Jaco Grobbelaar, Hlooho ya AfriForum ya Lebatowa le Bohareng, taelo ya lekgotla ke e nngwe ya pheletso ya Masepala wa Mafube, ho totobatsa ho se kgone ha masepala ho fana ka ditshebeletso. “Re amohela taelo le ntlha ya hore baahlodi ba supa hore masepala ha o na matlole a hlokahalang bakeng sa ho ntlafatsa marangrang. Taelo e boetse e netefatsa hore ho se sebetse hantle ha masepala ha ho na meedi le hore hape e hloka boikemisetso ba sepolotiki ho tobana le mathata. Masepala o ka mpa wa sebetsana le dinyewe dilemo tse ngata hoena le hore o tobane le mathata a ditoropo. Nako e lnepahetse hore baahi le mekgatlo ya poraefete e dumellwe ho fana ka ditshebeletso ka bobona le ho bokella matlole bakeng sa ditshebeletso tseo,” Grobbelaar o toboketsa jwalo.

Christa Ikking, Mohokahanyi  wa AfriForumwa Lebatowa la Dihlabeng, o hatella hore masepala ha o phethisi ka botlalo ditshwanelo tsa wona tsa molao mme o hlekefetsa baahi ka ho hloleha ho fana ka ditshebeletso. “Kahlolo e thathamisa makgetlo a mangatangata ao Masepala wa Mafube o ileng wa iswa kgotla ka diqoso tsa bolaodi le phano ya ditshebeletso e fokolang, empa ha ba tsotelle ho phethisa ditaelo tsa lekgotla. Leha ho le jwalo, kahlolo e tiisitse hore, maemong moo ho senang tlhompho ya makgotla a dinyewe, tlhompho e tla qobellwa haeba ho hlokahala.”

Ho ya ka Ikking, tsepamiso ya maikutlo e ka sehloohong ya kopo e ne e le ho ntshetsa pele ditabatabelo tsa badudi ba masepala le ho netefatsa hore phano ya ditshebeletso e a busesetswa mona. “Jwale re atlehile sepheong se seholwanyana sa ho qobella provense ho kena dipakeng le ho tlalehela lekgotla,” Ikking o realo ha a phethela.