Die inwoners van die Vrystaat kan nie langer die slagoffers wees van politieke speletjies en kaderontplooiing nie.

Verskeie burgemeesters wat reeds geïdentifiseer is vir sogenaamde “herontplooiing”, is steeds in hul poste terwyl interne politieke prosesse binne die ANC voortduur.

In plaas daarvan om onbevoegde of korrupte amptenare aanspreeklik te hou, word hulle bloot na ander poste of munisipaliteite verskuif. Hierdie praktyk ondermyn aanspreeklikheid en vererger die reeds kritieke toestand van baie Vrystaatse munisipaliteite.

Terwyl politieke faksiegevegte voortduur, stort infrastruktuur in duie, dienslewering versleg en gemeenskappe ly onder swak bestuur.

Ons, die ondertekenaars van hierdie petisie, eis dat:

• burgemeesters en munisipale bestuurders wat onbevoeg verklaar is of van korrupsie beskuldig word onmiddellik geskors word;
• die praktyk van kaderherontplooiing gestaak word;
• munisipale poste gevul word op grond van bevoegdheid, kwalifikasies en ervaring; en
• die belange van inwoners en belastingbetalers bo interne partypolitiek geplaas word.

Die inwoners van die Vrystaat verdien bevoegde bestuur en betroubare dienslewering, nie politieke rookskerms nie.