AfriForum yi sola mahungu yo hoxela no vavisa

AfriForum yi endle xikombelo xa xihatla eka vaakatiko, ngopfu lava nga eka swivandla swa vurhangeri, ku nga hoxeri kumbe ku hangalasa mahungu yo onhetela kumbe mikandziyiso ya swifaniso leyi nga na mahungu lama nga vangaka ntshikelelo exikarhi ka vaakatiko na mifuwo ya mimbango yo hambana ya rixaka. Ku ya hi AfriForum, swi fanerile nkarhi hinkwawo ku gingirika hi ku twanana no kombana xichavo emimbangwini na vaakatiko hinkwavo. Xikombelo xa AfriForum xi landzela nkandziyiso wa swifaniso, laha marito yo hlasela na ririmi ra nxungeto lowukulu ri tirhisiweke, leri hangalasiweke ngopfu eka swihangalasamahungu evhikini leri hundzeke, nakambe vatirhelamfumo va swiyimo swa vutihlamuleri vanyingi na varhangeri va tipolitiki na vona va vangeke mihlaselo na mahungu yo vavisa leswi nyanyisaka nkwetlembetano exikarhi ka mifuwo ya mimbango.

“AfriForum yi sola hi ku hetiseka nandzu na ririmi ro xungeta leri kongomisiweke eka yin’wana mifumo ya mimbango leri tirhisiweke eka nkandziyiso wa swifaniso. Ku avanyisa AfriForum, nhlangano wa tifanelo ta vanhu lowu tirhelaka ku tsakela ka vaakatiko, ku avanyisa tanihi “muvengatiko” na “muhlawulambala wa xiviri,” leswi endliweke hi Nomvula Mokonyane tanihi Museketeri wa Matsalaninkulu wo Sungula wa ANC, na swona a swi amukeleki,” ku vula Barend Uys, Nhloko ya Vuxaka bya Tinxaka na Ntirhisano (Intercultural Relations and Cooperation) eAfriForum.

AfriForum yi tlhela yi teka nhlamuselo ya Mahlengi Bhengu-Motsori, Muvulavulelarixaka wa ANC, ya leswaku AfriForum “a yi fanelangi ku siyiwa yoxe” yi ri leyi nyanyeke. “Nhlamuselo ya yena ya leswaku ‘nkongomiso wa ANC a wu fanele ku va eku hlanganiseni ka Maafrika-Dzonga’ a yi fambelani na migingiriko yo pfilunganya na timhaka leti kongomisiwaka eka AfriForum. Ku hambana na leswi a swi vulaka, i milawu ya ANC ya xikaya na ya matikohandle leyi vangeke ku onheka ka xifaniso xa Afrika-Dzonga,” ku hlamusela Uys.

Nhlangano wa tifanelo ta vanhu wu tshikelela nakambe leswaku mhaka leyi vuriweke hi Vincent Magwenya, Muvulavuleri wa Vupresidente ya leswaku AfriForum yi le “ku byaleni ka ku avana ka tinxaka no byala nchavo” a hi ntiyiso. “AfriForum yi tirha hi ku katsana na mimbango yo hambanahambana ya ndzhavuko na le madorobeni hi ku pela mindzilakano ya tinxaka hinkwato ku antswisa swiyimo swa rihanyo ra vaakatiko va xiyimo xa lehansi. I mahungu ya vatirhelamfumo vo tanihi Magwenya na van’watipolitiki vo fana na Bhengu-Motsori lava hi xiviri va vangaka ku avana ka tinxaka no hoxa ekhombyeni ku hanyisana hi ku rhula eAfrika-Dzonga. ANC va le ku lumbeteni ka AfriForum leswi vona hi voxe va nga na nandzu wa swona,” ku hetisela Uys.