AfriForum i sola maambele a khukhulisaho na a sinyusaho

AfriForum yo ita khuwelelo yo ṱavhanyiswaho kha vhadzulapo, zwihuluhulu vha re kha vhuimo ha vhurangaphanḓa, uri vha si ambe maipfi ane a khukhulisa kana u sinyusa kana u phaḓaladza vidio dzi re na zwithu zwine zwa nga vusa khakhathi vhukati ha vhadzulapo na zwitshavha zwo fhambanaho zwa mvelele. U ya nga AfriForum, ndi zwa ndeme tshifhinga tshoṱhe u ṱanganedza na u ṱhonifha zwitshavha zwa mvelele na vhadzulapo vhoṱhe. Khumbelo ya AfriForum i itiswa nga vidio ye ya phaḓaladzwa nga vhunzhi kha zwileludzi zwa vhudavhidzani vhege yo fhelaho, ye khayo ha shumiswa luambo sinyusaho na lu tshuwisaho nahone vhaofisiri vho vhalaho vha muvhuso na vharangaphanḓa vha politiki vho dovha vha amba zwithu zwi khukhulisaho na zwi sinyusaho zwine zwa ṋaṋisa u sa pfana vhukati ha zwitshavha zwa mvelele.

“AfriForum i sola tshoṱhe luambo lu khukhulisaho na lu sinyusaho lwe lwa livhiswa kha zwitshavha zwa dziṅwe mvelele lwo shumiswaho kha yeneyo vidio. A zwi ṱanganedzei u amba uri AfriForum, dzangano ḽine ḽa lwela pfanelo dza vhadzulapo, ndi dzangano “ḽi sa funi shango ḽapo” na “ḽine ḽa vha na tshiṱalulula tshihulwane,” u ya nga maambiwa a Tshanḓa tsha Muṅwaleli-Dzhenerala wa U Thoma wa ANC, Vho-Nomvula Mokonyane, na zwone a zwi ṱanganedzei,” u ya nga nga Vho-Barend Uys, Ṱhoho ya Vhushaka ha Tshumisano na Mvelele kha AfrioFrum.

AfriForum i dovha ya dzhia maambiwa a Vho-Mahlengi Bhengu-Motsiri, Muambeli wa Lushaka wa ANC, uri AfriForum “a yo ngo fanela u litshiwa i yoṱhe” a songo tea na luthihi. “U amba havho uri ANC i tea u ‘livhisa ṱhogomelo kha u ṱanganya vhathu vha Afurika Tshipembe’ a zwi tshimbilelani na zwiito zwa ḽeneḽo ḽihoro zwine zwa fhandekanya na maambiwa o livhiswaho kha AfriForm. U fhambana na zwe vha zwi amba, ndi mbekanyamaitele dza ANC dzapo na dza nnḓa dze dza tshinya zwihulu nḓila ine Afurika Tshipembe ḽa dzhiiwa ngayo,” hu ṱalutshedza Vho-Uys.

Dzangano ḽa pfanelo dza vhathu ḽi dovha ḽa ombedzela uri maambiwa a Vho-Vincent Magwenya, Muambeli wa Muphuresidennde, a uri AfriForum i khou “ṱavha u fhandekana ha matsinde na u ṱavha nyofho” ndi mazwifhi. “AfriForum i shuma nga maanḓa na zwitshavha zwo fhambanaho zwa mvelele na ḓoroboni u mona na mikano u itela u khwinisa matshilele a vhadzulapo vha re kha vhuimo ha fhasi. Ndi maambiwa a vhaofisiri vha muvhuso vha ngaho Vho-Magwenya na vhorapolitiki vha ngaho Vho-Bhengu-Motsiri ane, vhukuma, a bveledza u fhandekana ha matsinde na u vhea khomboni u tshilisana nga mulalo kha ḽa Afurika Tshipembe. ANC i khou pomoka AfriForum nga zwine yone ya vha na mulandu wazwo,” vha phetha nga u ralo Vho-Uys.