IAfriForum ichasa umthetho osayilwayo kaManyi ojonge ukuphelisa le nto yokuba abantu bekwazi ukuba umntu abe nomhlaba ongowakhe buqu; ithi ke kumaqela oluntu eenkcubeko zawo mabafumane iziqinisekiso zobunini bomhlaba wabo (iititle deeds)
Lo mthetho usayilwayo uphakanyisiweyo lilungu lepalamente leQela eliyiMK Party, uMzwanele Manyi, uhlasela ukukwazi kwabantu ukuba babe nomhlaba ongowabo; ukwahlasela onke amaqela oluntu eenkcubeko zawo namanye amaqela oluntu azamela ukuzimela angaxhomekeki, nokuzilawulela imicimbi yawo ngokweenkcubeko zawo, nokuba ngabantu abazikhulisayo ngokwabo kwiqela labo lenkcubeko, njengoko ubavumela umthetho wezizwe ngezizwe. Olu luluvo lombutho wamalungelo abantu abangengorhulumente, iAfriForum, oye wafaka, ngoLwesithathu, ilizwi lawo elibhaliweyo elichasa lo Mthetho-silungiso Usayilwayo wama22 kaManyi, osisiphakamiso sokutshintsha uMgaqosiseko – onjongo ikukuphelisa ukuba abantu babe nako ukuba ngabanini-mhlaba ongowabo kweli lizwe, nokwenza urhulumente abe ngumgcini wawo wonke umhlaba nezincedisi zendalo zonke ngokutshintsha ICandelo Lama25 loMgaqosiseko.
NgokukaBarend Uys, INtloko Yezobudlelwane Nentsebenziswano Phakathi Kweenkcubeko, kwiAfriforum, ezi nguqu ziphakanyisiweyo ziza kuba lulwaphulo lweInternational Covenant on Civil and Political Rights, kwakunye nala Masolotya: elesi3, nele14, nele19, nelama20, nelama21 nelama28 eTshatha YaseAfrika Yamalungelo Oluntu NawaBantu. “IAfriForum imemelela onke amaqela oluntu eenkcubeko zawo, kunye neenkokeli zawo ukuba akhawuleze asebenzise ngokungxamisekileyo, ICandelo Lama20 lomthetho obizwa ngokuthi yiUpgrading of Land Tenure Rights Act 112 of 1991 ukuze azifumanele iziqinisekiso zobunini (iititle deeds) zomhlaba okulawulo lwazo,” utsho u-Uys.
IAfriForum iwukhaba ngawo omane lo mthetho usayilwayo; kwilizwi layo elibhaliweyo yona iphakamise ukuba ICandelo Lama25 loMgaqosiseko malingatshintshwa, ngenxa yezi zizathu zilandelayo, phakathi kwezinye:
- Uya kubangela ukupheliswa kobunini babantu kumhlaba ongowabo, nokucinywa kwelungelo loluntu lentsusa eliqinisekisiweyo kungonku nje yiBhili Yamalungelo.
- Uya kudala imeko apho umntu ngamnye kwabo beqela lenkcubeko elingama-Afrikaner kunye nabamanye amaqela eenkcubeko angamagcuntswana benziwe abemi abangamasekeni, nto leyo ikukushenxa kumgqaliselo wobumi obulinganayo nokulingana phambi komthetho.
- Uya kuwenza amaqela eenkcubeko ngokwemveli kunye neenkokeli ezinobukhosi, eziziinkokeli zala maqela, babe ngabaqeshiselwa bamphelo emhlabeni wabo ngokwenene, ubavalele ekubeni ngabanini bomhlaba wabo ngokusemthethweni, apho balawula ngokuzeleyo bengaphazanyiswa nto. Uya kuthintela ukubuyiselwa ngokupheleleyo kwesidima nebhongo nokuzithemba ngokweenkcubeko kumaqela eenkcubeko neenkokeli zawo ezinobukhosi, kuba kaloku baya kuchazwa umphelo njengabantu ekuthiwa “abakulungelanga” ukuba ngabanini bomhlaba wabo nokuzilawulela wona ngokuzeleyo.
- Uya kugqitha apho ubangele ukudeleleka kwegunya leenkokeli eziziinkosi neempembelelo zazo, nelamaziko eenkokeli zemveli nelamanye amaziko asekwe ngamaqela oluntu; ube ngelo xesha ukwanciphisa ukuzimela ngokweenkcubeko, kwanamalungelo eenkcubeko ngokubanzi. Olu tshintsho luya kuvulela ugonyamelo oluqhubekayo noluhlala lusanda lwamagosa karhulumente phezu kophuhliso, nokuphathwa nokulawulwa komhlaba neepropati zamaqela oluntu nezeendawo ahlala kuzo la maqela oluntu.
- Uya kubangela ukuba onke amaqela oluntu eenkcubeko namanye amaqela oluntu, kunye namakhaya kanti nabantu ngabanye, abasele bafumana, ukuza kuthi ga ngoku, umhlaba nobunini bawo kulaa nkqubo yobuyiselo mihlaba, bonke baphinde bahluthwe umhlaba wabo, kubuyiseleke umva konke ababesele bekufumene kulaa nkqubo.
- Uya kubangela intlekele ngakwezoqoqoqsho, kunye ke ngoko, nembandezelo engathethekiyo kubantu abaluninzi lwabemi beli lizwe, njengoko abatyali-zimali beya kuphelelwa kukulthemba eli lizwe.
“Lo mthetho uyilwayo ufunzele ngqo kuma-Afrikaner njengoluntu olunenkcubeko yalo ezimeleyo, njengoko ama-Afrikaner ekuphela kweqela lenkcubeko elijonga umhla wesi6 kuEpreli ka1652 njengomhla obalulekileyo ekusekekeni nasekukhuleni kwalo njengeqela loluntu elinekcubeko yalo apha eMazantsi Afrika. Awuyihoyi le nto yokuba sisisizwe esineendidi-ndidi zeenkcubeko nembali ephinya-phinyeneyo kweli lizwe nakule ngingqi, imbali emalunga neehambo ngeehambo zemfuduko zamaqela oluntu aneenkcubeko zawo, nezamakhaya nezabantu ngabanye, ukwakhiwa nokupheliswa kwamaqela oluntu lweenkcubeko namanye amaqela oluntu nezizwe ekuhambeni kwamaxesha kunye neenguqu ezihamba noko ekusetyenzisweni komhlaba, nasekuhlaleni kwiindawo ezithile, nasekubeni babe nomhlaba futhi babe ngabanini bawo, kwakunye neempembelelo zendalo esingqongileyo nezemo yezulu kule meko yomhlaba,” uqukumbela atsho u-Uys.
