Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum wens UP-student geluk met historiese mylpaal vir Tswana-moedertaalonderrig

Dekfoto: Dr. Bodibadi Modungwa tydens haar gradeplegtigheid. Bron: Facebook, Universiteit van Pretoria

Die burgerregteorganisasie AfriForum het vandag dr. Bodibadi Modungwa geluk gewens met die voltooiing van haar PhD in Tswana – die eerste tesis in dié taal aan die Universiteit van Pretoria (UP). AfriForum benadruk dat die onderneming van gevorderde studies in plaaslike moedertale van kritieke belang is vir die land se onderskeie taal- en kultuurgemeenskappe om werklik vry en voorspoedig te wees en om die ontwikkeling van dié tale te bevorder om hoër taalfunksies te vervul.

Modungwa het vroeër vandeesmaand haar PhD verwerf vir haar navorsing oor Tswana-moedertaalonderrig vir graad 11- en 12-leerders. Sy het dié prestasie behaal ná meer as drie dekades se toegewyde werk in die onderwys en bevordering van moedertaalonderrig. Volgens ’n berig op die UP-webblad, ag Modungwa hierdie mylpaal as ’n bevestiging van die waarde van haar moedertaal en Tswana-kultuur, terwyl dit ook die “deur open vir verdere navorsing, bewaring en erkenning van Afrika-tale in hoër onderwys”.

Volgens Barend Uys, hoof van Interkulturele Verhoudings en Samewerking by AfriForum, bied moedertaalonderrig uiteenlopende voordele. “Mense wat taalgebruik, redenasievermoë en die begrip van abstrakte konsepte – soos byvoorbeeld wiskundeformules – eers in hul eie taal bemeester, kan dit makliker in ’n tweede of derde taal onder die knie kry. Daarbenewens is dit bewys dat mense wat moedertaalonderrig op skool ontvang, op die lange duur akademies beter presteer, minder geneig is om skool te verlaat voordat hulle matriek slaag en waarskynlik meer naskoolse kwalifikasies sal behaal,” verduidelik hy.

Modungwa het deur haar prestasie bewys dat Tswana ’n regmatige plek het as ’n taal met hoër taalfunksies en ’n taal wat tot voordeel van sy sprekers verder ontwikkel moet word.

“Om ’n taal lewend te hou, moet dit vreesloos gebruik kan word – en Modungwa het deur haar vreeslose en onbeskaamde gebruik van Tswana vir haar PhD-studies ’n historiese mylpaal vir dié taal aan UP bereik. Ons hoop is dat haar werk as die aansporing sal dien van nog trotse Tswana-akademici om te help om dié taal verder uit te bou tot ’n dinamiese en florerende wetenskapstaal wat sy skoene kan volstaan in die geselskap van ander tale met gevestigde en uitgebreide hoër funksies,” sluit Uys af.