Who and what is AfriForum?

AfriForum is an Afrikaans civil rights organisation that protects the rights of minority groups at national as well as provincial level, and anyone who can identify with AfriForum’s principles and objectives may join the organisation. AfriForum’s community plan focuses on mobilising communities to thus take control of their own streets and neighbourhoods again. AfriForum ensures that your constitutional and civil rights are recognised and protected at national level.

Wie en wat is AfriForum?

AfriForum is ’n Afrikaanse burgerregteorganisasie wat die regte van minderheidsgroepe op sowel nasionale as provinsiale vlak beskerm, en enigiemand wat met AfriForum se beginsels en doelstellings kan identifiseer, mag by die organisasie aansluit. AfriForum se gemeenskapsplan fokus daarop om gemeenskappe te mobiliseer om só weer beheer terug te neem oor hul eie strate en woonbuurtes. AfriForum verseker dat jou grondwetlike én burgerregte op nasionale vlak erken en beskerm word.

AfriForum veroordeel kwetsende en opruiende uitsprake

AfriForum doen ’n dringende beroep op burgers, en veral dié in leiersposisies, om nie kwetsende of opruiende uitsprake te maak of video’s daarvan te versprei wat spanning tussen burgers en verskillende kultuurgemeenskappe kan veroorsaak nie. Volgens AfriForum is dit noodsaaklik om deurgaans met wedersydse erkenning en respek teenoor alle kultuurgemeenskappe en landsburgers op te tree. AfriForum se beroep volg nadat ’n video, waarin ernstige kwetsende en dreigende taal gebruik is, die afgelope week wyd op sosiale media versprei is, en verskeie regeringsamptenare en politieke leiers ook beledigende en opruiende uitsprake gemaak het wat spanning tussen kultuurgemeenskappe verhoog.

“AfriForum veroordeel die kwetsende en dreigende taal wat teenoor ander kultuurgemeenskappe in die video gebruik word, ten sterkste. Om AfriForum, ’n burgerregte-instelling wat in belang van burgers optree, as ‘onpatrioties en baie rassisties’ te brandmerk soos wat die eerste adjunk-sekretaris-generaal van die ANC, Nomvula Mokonyane, gemaak het, is ook onaanvaarbaar,” sê Barend Uys, hoof van Interkulturele Verhoudings en Samewerking by AfriForum.

AfriForum beskou ook Mahlengi Bhengu-Motsiri, die ANC se nasionale woordvoerder, se opruiende opmerking dat AfriForum “nie uitgelos moet word nie” in ’n baie ernstige lig. “Haar bewering dat die ANC se fokus nou op die vereniging van Suid-Afrikaners moet wees, strook nie met die party se verdelende optrede en uitsprake teenoor AfriForum nie. Anders as wat sy beweer, is dit die ANC se binne- en buitelandse beleid wat die skade aan Suid-Afrika se beeld veroorsaak het,” verduidelik Uys.

Die burgerregteorganisasie benadruk voorts ook dat Vincent Magwenya, woordvoerder van die Presidensie, se uitspraak dat AfriForum “rasseverdeeldheid en vrees saai”, eenvoudig onwaar is. “AfriForum werk aktief saam met verskeie tradisionele gemeenskappe en in dorpe oor kultuurgrense heen om die lewensomstandighede van burgers op voetsoolvlak te verbeter. Dit is juis uitsprake van regeringslui soos Magwenya en politici soos Bhengu-Motsiri wat in werklikheid rasseverdeeldheid veroorsaak en vreedsame naasbestaan in Suid-Afrika in gedrang bring. Hierdeur beskuldig die ANC AfriForum inderwaarheid van dít waaraan hulle self skuldig is,” sluit Uys af.

Dekfoto: Vincent Magwenya, woordvoerder van die Presidensie (GovernmentZA, Flickr)